Foto nga VCG
Irani tha të dielën se Shtetet e Bashkuara i janë përgjigjur planit prej 14 pikash të propozuar nga Teherani që synon t’i japë fund konfliktit, ndërsa Uashingtoni sinjalizoi pakënaqësi me kushtet dhe teksa tensionet vazhdojnë të përhapen në të gjithë rajonin dhe tregjet globale të energjisë.
Zëdhënësi i Ministrisë së Jashtme iraniane, Esmaeil Baghaei, tha në një intervistë me televizionin shtetëror IRIB se përgjigjja e ShBA-së është aktualisht në shqyrtim. Ai theksoi që propozimi përqendrohet vetëm në përfundimin e armiqësive dhe nuk trajton çështje të detajuara bërthamore.
“Aktualisht, ne jemi të përqendruar në parametrat që lidhen me përfundimin e luftës në rajon, përfshirë Libanin,” tha Baghaei, duke shtuar se “nuk kemi negociata bërthamore në këtë fazë”.
Shtetet e Bashkuara nuk e kanë konfirmuar zyrtarisht përgjigjen e tyre, megjithatë njoftohet që presidenti amerikan Donald Trump ka thënë që propozimi është i papranueshëm.
“Nuk është i pranueshëm për mua. E kam studiuar, kam studiuar gjithçka. Nuk është i pranueshëm,” citoi “Kan News” të ketë thënë Trump-i në një intervistë të shkurtër telefonike.
Trump-i u shpreh që fushata po shkon “shumë mirë”, duke shtuar se “iranianët duan të bëjnë një marrëveshje, por unë nuk jam i kënaqur me atë që kanë ofruar” dhe që “ka gjëra me të cilat nuk mund të pajtohem”.
