Foto nga Ministria e Jashtme e Kinës
Të shtunën në kryeqytetin e Mongolisë, Ulan Bator, presidenti i Mongolisë Ukhnaa Khurelsukh pati takim me Wang Yi, ministër i Jashtëm i Kinës dhe anëtar i byrosë politike të Komitetit Qendror të Partisë Komuniste të Kinës.
Gjatë takimit, Khurelsukh tha se marrëdhënia Mongoli-Kinë është bërë një model për marrëdhëniet ndërshtetërore në rajon.
Ai tha se dy vendet kanë respektuar vazhdimisht pavarësinë, sovranitetin dhe integritetin territorial të njëra-tjetrës, duke thelluar bashkëpunimin me përfitim të ndërsjellë në sektorë të ndryshëm, duke vënë në dukje se tregtia dypalëshe pritet të arrijë 20 miliardë dollarë këtë vit.
Duke përshkruar Kinën si një fqinj të mirë të Mongolisë, Khurelsukh tha se zhvillimi i marrëdhënieve miqësore me Kinën është një prioritet kryesor i politikës së jashtme të Mongolisë.
Khurelsukh tha se Mongolia është e përkushtuar ndaj parimit të “një Kine”, duke e konsideruar Tajvanin si një pjesë të pandashme të territorit të Kinës, dhe kundërshton çdo formë aktiviteti për “pavarësi të Tajvanit”. Ai gjithashtu i konsideron si çështje të brendshme të Kinës ato që lidhen me Hong Kong, Xizang dhe Xinjiang, duke shtuar se Mongolia nuk do të bëjë asgjë që dëmton interesat e Kinës, pa marrë parasysh marrëdhëniet e saj me të tjerat.
Khurelsukh gjithashtu përmendi se Mongolia është e gatshme të forcojë bashkëpunimin me Kinën në çështje rajonale dhe ndërkombëtare.
Nga ana e tij, Wang Yi tha se Kina gjithmonë ka vendosur marrëdhëniet Kinë-Mongoli në një vend të rëndësishëm në diplomacinë e saj të fqinjësisë, duke theksuar se Kina ka si dëshirën ashtu edhe aftësinë të jetë një fqinj, në të cilin Mongolia mund të mbështetet, një mik i besueshëm dhe një partner për zhvillimin e saj.
Wang rideklaroi respektin e Kinës për pavarësi, sovranitet dhe tërësi territoriale të Mongolisë, si dhe për rrugën e zhvillimit që ka zgjedhur Mongolia.
Ai shprehu gatishmërinë për të punuar më ngushtë me Mongolinë për të harmonizuar strategjitë e zhvillimit, për të shfrytëzuar potencialin e plotë të bashkëpunimit dypalësh, për të avancuar bashkëpunimin ekzistues në fusha si ndërlidhje, energji dhe burime minerale, tregti dhe investime, si dhe për të krijuar nxitës të rinj të rritjes për bashkëpunim në minerale kyçe, zhvillim të gjelbër, ekonominë digjitale dhe fusha të tjera në zhvillim.
