foto nga Ministria e Jashtme e Kinës
Të shtunën kryeministri kroat Andrej Plenkovic u takua me ministrin e jashtëm kinez Wang Yi, që po vizitonte Kroaci. Plenkovic ka shprehur gatishmërinë e Kroacisë për të thelluar bashkëpunimin me Kinën në fusha të ndryshme dhe brenda mekanizmit të bashkëpunimit Kina-Vendet e Evropës Qendrore dhe Lindore (EQL).
Wang, që është edhe anëtar i Byrosë Politike të Komitetit Qendror të Partisë Komuniste të Kinës, tha se Kina vlerëson miqësinë e saj tradicionale me Kroacinë dhe është e gatshme të përmirësojë më tej marrëdhëniet dypalëshe të bazuar në partneritetin e gjithanshëm.
Wang theksoi se Kina dhe EQL kanë nevojë praktike për të forcuar shkëmbimet dhe për të avancuar bashkëpunimin. Ai tha se një bashkëpunim i tillë është plotësisht i hapur dhe transparent dhe ndihmon në avancimin e integrimit evropian, duke shtuar se Kina është e gatshme të thellojë bashkëpunimin në fusha të ndryshme brenda kornizës me vendet e rajonit që dëshirojnë të marrin pjesë.
Kina vlerëson qëndrimin pozitiv të Kroacisë dhe shpreson të përdorë përvjetorin e 15-të të mekanizmit të bashkëpunimit Kina-EQL vitin e ardhshëm si një mundësi për të rigjallëruar bashkëpunimin e dobishëm për të dyja palët, theksoi Wang.
Lidhur me marrëdhënie ekonomike dhe tregtare Kina-BE, Plenkovic tha se vendet e BE-së, përfshirë Kroacinë, kanë shqetësime për pabarazitë tregtare. Ai theksoi se samiti i fundit i BE-së vlerësoi pozitivisht konsensusin e arritur përmes mekanizmit të konsultimeve për tregti dhe investime Kina-BE dhe bëri thirrje për komunikim dhe dialog të vazhdueshëm për të adresuar si duhet dallimet.
Wang tha se Kina është e gatshme të forcojë dialogun me BE-në në frymën e barazisë dhe përfitimit të ndërsjelltë, të mbrojë së bashku tregtinë e lirë dhe të promovojë një globalizim ekonomik të hapur dhe gjithëpërfshirës.
Wang gjithashtu shkëmbeu mendime me Plenkovic rreth situatës në Ballkanin Perëndimor, duke thënë se Kina shpreson që vendet e rajonit të rrisin mirëkuptimin, të rindërtojnë besimin dhe të jetojnë në paqe përmes dialogut.
