Foto nga Chinanews.com
Dialogu Botëror i Kryebashkiakëve për vitin 2026 , me temë “Hapje dhe ndërlidhje, mundësi të përbashkëta”, zhvillohet nga 2 deri më 5 nëntor në qytetin Ningbo të Kinës Lindore.
Rreth 200 të ftuar kinezë e të huaj, përfshirë kryebashkiakë të qyteteve të binjakëzuara me Ningbo-n, përfaqësues të misioneve diplomatike në Kinë dhe përfaqësues të organizatave ndërkombëtare, jantë mbledhur për të diskutuar lidhur me zgjerimin e bashkëpunimit dhe krijimin e mundësive të reja për zhvillimin e qyteteve.
Ningbo është një nga qendrat kryesore të hapjes së Kinës ndaj botës. Qyteti njihet për trashëgiminë e pasur kulturore dhe portin e tij që e lidh me tregjet ndërkombëtare, ndërsa renditet ndër qytetet kryesuese të vendit në fushën e prodhimit inteligjent.
Foto nga Chinanews.com
Dialogu do të përqendrohet në çështjet e përbashkëta të qyteteve, si zhvillimi i qëndrueshëm dhe tranzicioni i gjelbër, duke nxitur shkëmbimin e përvojave dhe bashkëpunimin me përfitim të ndërsjellë.
Sipas organizatorëve, aktiviteti do të përfshijë një takim kryesor, dy dialogë tematikë dhe tri veprimtari të shkëmbimeve kulturore.
Temat e dy dialogëve janë “Qeverisja inteligjente dhe bashkëjetesa: Inovacioni teknologjik transformon qytetet” dhe “Qëndrueshmëria e zhvillimi: Ndërlidhja dhe bashkëpunimi mes qyteteve portuale”.
Gjatë takimit kryesor, pjesëmarrësit do të diskutojnë mbi epërsitë e veçanta të qyteteve dhe ndërkombëtarizimin e tyre, bashkëpunimin e hapur dhe zhvillimin urban, si edhe shkëmbimet kulturore dhe forcimin e lidhjeve mes popujve. Në këtë takim do të publikohet zyrtarisht edhe dokumenti “Konsensusi i Ningbo-s për bashkëpunim dhe zhvillim”.
Foto nga Chinanews.com
Në kuadër të dialogëve tematikë, të ftuarit do të vizitojnë kompani të robotikës dhe zona portuale të Ningbo-s. Ata do të diskutojnë në mjedise të hapura për inovacionin teknologjik, qeverisjen urbane, forcimin e qëndrueshmërisë ekonomike të qyteteve dhe nxitjen e zhvillimit të qëndrueshëm.
Ndërkohë, gjatë veprimtarive kulturore, pjesëmarrësit do të vizitojnë lagje historike, do të ndjekin shfaqje artistike dhe do të njihen nga afër me traditat e Ningbo-s, përfshirë kulturën e ruajtjes së librave, porcelanin celadon dhe trashëgiminë kulturore të Rrugës Detare të Mëndafshit.
