Foto nga VCG
Presidenti kinez Xi Jinping zhvilloi të mërkurën bisedime të veçanta me homologun e vet rus Vladimir Putin dhe atë amerikan Donald Trump, një raund i rrallë diplomatik brenda një dite.
Ndërveprimet e së njëjtës ditë, sipas analistëve, theksojnë përpjekjet e Kinës për të promovuar koordinimin midis vendeve të mëdha, për të parandaluar përshkallëzimin e tensioneve globale dhe për të ruajtur qëndrueshmërinë strategjike globale mes pasigurisë globale në rritje.
Gjatë takimit virtual me Putinin, Xi i hodhi një vështrim përparimit në marrëdhëniet kino-rus gjatë vitit të kaluar, duke përmendur arritjet në koordinimin strategjik, bashkëpunimin ekonomik, shkëmbimet kulturore dhe mekanizmat shumëpalësh.
Ai vuri në dukje që të dy palët përkujtuan së bashku 80-vjetorin e fitores në Luftën Botërore Antifashiste, duke ripohuar angazhimin e tyre për të mbrojtur rezultatet e Luftës së Dytë Botërore dhe për të mbështetur drejtësinë ndërkombëtare.
Shkëmbimet ekonomike dhe tregtare patën një zhvillim të fuqishëm, tha Xi. Të dhënat zyrtare tregojnë që tregtia Kinë-Rusi arriti në 228.1 miliardë dollarë në vitin 2025, duke i tejkaluar 200 miliardë dollarët për tre vjet rresht.
Lidhur me bashkëpunimin shumëpalësh, Xi theksoi koordinimin e të dy vendeve brenda Organizatës së Bashkëpunimit të Shangait, i cili, sipas tij, kontribuoi në ndërtimin e një sistemi më të drejtë dhe më të arsyeshëm të qeverisjes globale.
Nga ana e tij, Putini tha që Rusia është e gatshme të vazhdojë të mbështesë fuqimisht Kinën në mbrojtjen e sovranitetit dhe sigurisë, zgjerimin e bashkëpunimit në arsim e kulturë, si edhe promovimin e begatisë së përbashkët për të dy popujt.
Foto nga VCG
Ndërsa telefonata e Xi Jinping-ut me Trump-in u përqendrua në drejtimin e marrëdhënieve Kinë-ShBA përmes dallimeve, duke zgjeruar bashkëpunimin.
Xi bëri thirrje për komunikim më të fortë, menaxhimin e duhur të dallimeve, zgjerimin e bashkëpunimit praktik dhe thellimin e besimit, duke i nxitur të dyja palët të eksplorojnë një rrugë bashkëjetese paqësore dhe bashkëpunimi me dobi të ndërsjellë.
Nga ana e tij, Trump-i vuri në dukje që marrëdhëniet ShBA-Kinë janë marrëdhëniet më të rëndësishme dypalëshe në botë. Ai u shpreh që mirëpret suksesin e Kinës dhe se Shtetet e Bashkuara janë të gatshme të forcojnë bashkëpunimin dhe të promovojnë zhvillimin e qëndrueshëm të marrëdhënieve dypalëshe.
Xi theksoi gjithashtu çështjen e Tajvanit, duke thënë se është çështja më e rëndësishme në marrëdhëniet Kinë-SHBA. Ai përsëriti se Kina do të mbrojë fuqimisht sovranitetin dhe integritetin territorial, duke i kërkuar palës amerikane ta trajtojë me kujdes çështjen e shitjes së armëve Tajvanit.
Trump-i tha që i kupton shqetësimet e Kinës për çështjen e Tajvanit dhe se është i gatshëm të ruajë marrëdhënie të qëndrueshme dypalëshe gjatë mandatit të tij.
Wang Yiwei, profesor në Universitetin Renmin të Kinës, i tha CGTN-it se angazhimet e njëpasnjëshme të Kinës pasqyrojnë përpjekjet e saj për të promovuar koordinimin midis fuqive të mëdha, për të parandaluar llogaritjet e gabuara dhe për të mbështetur një mjedis ndërkombëtar më të qëndrueshëm.
Wang theksoi se, ndërsa rendi i vjetër ndërkombëtar përballet me një gërryerje në rritje, Kina synon të punojë me forcat kryesore globale për të ndërtuar një botë shumëpolare më të barabartë e të rregullt dhe për të nxitur një formë më përfshirëse të globalizimit ekonomik, me qëllimin përfundimtar të ndërtimit të një bashkësie me të ardhme të përbashkët për njerëzimin.
