Foto nga VCG
Presidenti i ShBA-së Donald Trump tha të dielën se shpreson që Uashingtoni dhe Teherani do të arrijnë një marrëveshje, duke iu përgjigjur paralajmërimeve nga udhëheqësi i lartë i Iranit Ajatollah Ali Khamenei se çdo goditje e ShBA-së ndaj Iranit do të ndezë një luftë më të gjerë rajonale.
Komentet e Trump-it pasojnë rritjen e trysnisë nga ShBA-ja mbi Iranin, duke përfshirë vendosjen e mjeteve të shumta detare në rajon, duke ngritur shqetësime rreth një përshkallëzimi të mundshëm ushtarak.
Më parë po atë ditë, ministri i Jashtëm iranian Abas Araghchi tha se Teherani mbetet i sigurt që një marrëveshje bërthamore me Shtetet e Bashkuara është e mundshme, pavarësisht nga mosbesimi i thellë ndaj Uashingtonit.
Në një intervistë me CNN-in, Araghchi tha se Irani është i hapur për negociata “të ndershme dhe të drejta”, duke shtuar që shkëmbimet e tërthorta të mesazheve midis Teheranit dhe Uashingtonit, të mundësuara nga vendet mike rajonale, kanë qenë “të frytshme.”
Në të njëjtën kohë, Araghchi e bëri të qartë që Irani është përgatitur për çdo skenar ushtarak. Ai paralajmëroi se çdo goditje e ShBA-së do të hasë në një përgjigje “më të ashpër dhe më të vendosur” sesa gjatë konfliktit 12-ditor të vitit të kaluar me Izraelin, duke shtuar se një luftë e tillë mund të shtrihet përtej Iranit dhe të bëhet “një fatkeqësi për të gjithë”, me bazat amerikane anembanë rajonit ndërmjet objektivave të mundshëm.
Zyrtarët e Shtëpisë së Bardhë thanë që Trump-i nuk ka marrë një vendim përfundimtar për goditje ushtarake kundër Iranit dhe mbetet i hapur për një zgjidhje diplomatike.
