Foto nga VCG
Autoritetet kineze kanë zbuluar një sërë rregullash të përkohshme për të forcuar kontrollin dhe menaxhimin e minierave, shkrirjes dhe ndarjes së metaleve të rralla të tokës, shkruan “Xinhua”.
Rregullat e përkohshme u lëshuan bashkërisht nga Ministria e Industrisë dhe Teknologjisë së Informacionit, Komisioni Kombëtar i Zhvillimit dhe Reformës dhe Ministria e Burimeve Natyrore.
Duke marrë parasysh disa faktorë, duke përfshirë objektivat e zhvillimit ekonomik kombëtar, rezervat e metaleve të rralla të vendit dhe llojet e tyre, zhvillimin e industrisë, mbrojtjen ekologjike dhe kërkesën e tregut, sipas rregullave, autoritetet do të vendosin objektiva vjetore të kuotave për minierat, shkrirjen dhe ndarjen e metaleve të rralla të tokës dhe do t’ua ndajnë më tej këto kuota firmave të lidhura.
Këto firma duhet të kryejnë aktivitete minierash, shkrirjesh dhe ndarjeje brenda kufijve të miratuar të kuotave, duke iu përmbajtur në mënyrë strikte ligjeve dhe rregulloreve administrative.
Rregullat specifikojnë gjithashtu që prodhuesit e metaleve të rralla të tokës duhet të mbajnë të dhëna të sakta të rrjedhës së produkteve dhe t’i ngarkojnë të dhënat në një sistem informacioni gjurmueshmërie për produktet e metaleve të rralla të tokës.
Autoriteteve lokale iu është kërkuar të rrisin mbikëqyrjen dhe inspektimin e zbatimit të kuotave dhe të adresojnë shkeljet në përputhje me ligjin.
Në metalet e rralla të tokës përfshihen 17 elementë, të cilët përdoren gjerësisht në produktet e teknologjisë së lartë, duke filluar nga televizorët me ekran të sheshtë deri te laserët dhe makinat hibride.
