Foto nga VCG
Kina ka 43 për qind të numrit të përgjithshëm të patentave të autorizuara globalisht të nanoteknologjisë gjatë 25 vjetëve të fundit, duke u renditur në vendin e parë në botë, thuhet në një libër të bardhë të publikuar të dielën.
Nga viti 2000 deri më 2025, më shumë se 1.07 milion patenta nanoteknologjike u dhanë globalisht, 464 000 nga të cilat për Kinën, duke tejkaluar numrin e patentave të Shteteve të Bashkuara, Japonisë dhe Koresë së Jugut të marra së bashku, sipas Librit të Bardhë: Industria kineze e nanoteknologjisë 2025, që u publikua në një forum të industrisë së nanoteknologjisë në Pekin.
Patentat e Kinës janë të fokusuara kryesisht në fushat kyçe, duke përfshirë pajisjet e gjysmëpërcjellësve, kiminë katalitike, biomjekësinë dhe materialet e reja. Pekini, Shangai, Shenzhen-i dhe Suzhou kryesojnë në fushën e gjysmëpërcjellësve, ndërsa patentat lidhur me biomjekësinë janë përqendruar në Pekin, Shangai dhe Guangzhou, bëhet e ditur në këtë dokument.
Deri në majin e sivjetshëm, numri i ndërmarrjeve nanoteknologjike në Kinë i kaloi 34 500, 739 nga të cilat të regjistruara në bursë, me një numër të përgjithshëm vendesh pune 9.92 milionë. Tregu global i nanoteknologjisë parashikohet të rritet në 1.5 trilion dollarë amerikanë deri në fund të këtij viti, me një normë rritjeje vjetore mbi 17 % nga 2018 deri më 2025, sipas dokumentit.
Forumi i industrisë së nanoteknologjisë është një nga nënforumet e Konferencës së 10-të Ndërkombëtare mbi Nanoshkencën dhe Teknologjinë, i organizuar në Pekin nga e shtuna deri të hënën nga Qendra Kombëtare për Nanoshkencën dhe Teknologjinë e Kinës.
