Foto nga Ministria e Jashtme e Kinës
Kina është e gatshme të punojë me Malajzinë, për të zbatuar konsensusin e arritur nga liderët e dy vendeve për ndërtimin e një komuniteti strategjik të nivelit të lartë Kinë-Malajzi me një të ardhme të përbashkët, tha të enjten Ministri i Jashtëm Wang Yi.
Wang, gjithashtu anëtar i Byrosë Politike të Komitetit Qendror të PKK, i bëri deklaratat gjatë takimit me Ministrin e Jashtëm të Malajzisë Mohamad Hasan në Kuala Lumpur.
Wang u kërkoi të dy vendeve të zbatojnë plotësisht planet e bashkëpunimit për ndërtimin e përbashkët të nismës “Një Brez, një Rrugë”, të forcojnë bashkëpunimin në ekonomi, tregti, investime dhe lidhshmëri. Projekte kyçe si Lidhja Hekurudhore e Bregut Lindor (ECRL) dhe “Dy Vende, Parqe Binjake” duhet të promovohen vazhdimisht.
Ai gjithashtu bëri thirrje për bashkëpunim më të thellë në sektorët në zhvillim dhe në kufi, me qëllimin për të ndërtuar së bashku një qendër rajonale për forca të reja prodhuese cilësore.
Lidhur me marrëdhëniet Kinë-ASEAN, Wang tha se Kina dhe ASEAN janë fqinjë të mirë, miq të mirë dhe partnerë të mirë. Të dyja palët kanë përfunduar plotësisht negociatat për Zonën e Tregtisë së Lirë Kinë-ASEAN Versioni 3.0, duke demonstruar me veprime konkrete angazhimin e tyre të përbashkët për zgjerimin e tregut dhe ruajtjen e tregtisë së lirë.
Wang vuri në dukje se lëvizja e Shteteve të Bashkuara për të vendosur tarifa të larta ndaj vendeve ASEAN, është një akt tipik i ngacmimit dhe unilateralizmit, që asnjë vend nuk do ta mbështeste. Ai tha se kundërmasat e forta të Kinës nuk synojnë vetëm mbrojtjen e interesave të veta, por edhe mbrojtjen e interesave të përbashkëta të të gjitha vendeve, përfshirë anëtarët e ASEAN.
Kina, shtoi ai, është e gatshme të forcojë bashkëpunimin me ASEAN për të mbështetur sistemin tregtar shumëpalësh, për të ruajtur stabilitetin e zinxhirëve globalë industrialë dhe të furnizimit, si edhe për të promovuar globalizimin ekonomik gjithëpërfshirës.
Nga ana e tij, Mohamad tha se marrëdhëniet Malajzi-Kinë janë në nivelin e tyre historik më të mirë. Me rritjen e pasigurisë në botë, është koha e duhur për të forcuar bashkëpunimin midis Malajzisë dhe Kinës, si edhe bashkëpunimin e ASEAN. Ai tha se Malajzia e vlerëson miqësinë midis dy vendeve dhe i përmbahet me vendosmëri politikës së një Kine të vetme.
Ai shprehu mbështetjen e Malajzisë për tre nismat globale të Kinës – Nismën për Zhvillim Global, Nismën për Siguri Globale dhe Nismën për Qytetërim Global. Gjithashtu tha se vendi është i gatshëm të thellojë bashkëpunimin praktik me Kinën në fusha si tregtia dhe investimet, infrastruktura, ekonomia dixhitale dhe zhvillimi i gjelbër.
Në rrethanat aktuale, theksoi Mohamad, është e qartë se kush janë miqtë e vërtetë. Duke u përballur me çështje të tilla si tarifat, Malajzia nuk do të marrë në konsideratë vetëm interesat e veta dhe nuk do të sakrifikojë interesat e palëve të treta, pasi kjo nuk është mënyra e ASEAN-it.
Burimi ©CGTN
