foto nga MPJ e Kinës
Ministri i Jashtëm i Kinës Wang Yi bëri thirrje të shtunën për nxitjen e zhvillimit të shëndetshëm, të qëndrueshëm dhe të vazhdueshëm të marrëdhënieve Kinë-Kanada, gjatë takimit që pati me homologen e tij kanadeze Anita Anand, në kuadrin e Konferencës së 62-të të Sigurisë të Mynihut.
Wang, gjithashtu anëtar i Byrosë Politike të Komitetit Qendror të Partisë Komuniste të Kinës, tha se vizita e kryeministrit Mark Carney në Kinë u kurorëzua me rezultate të frytshme, gjë që pasqyron plotësisht se qeveria e re kanadeze zbaton një politikë të re ndaj Kinës.
Kjo u shërben interesave të përbashkëta të të dy vendeve dhe është një zgjedhje krejtësisht e drejtë, vuri në dukje ai.
Të dy udhëheqësit kanë arritur konsensus për krijimin e një tipi të ri të partneritetit strategjik midis Kinës dhe Kanadasë, duke ofruar udhëzime strategjike për zhvillimin e shëndetshëm të marrëdhënieve dypalëshe, u shpreh Wang.
Ministri i Jashtëm kinez theksoi që Kina është e gatshme të bashkëpunojë me Kanadanë për të zbatuar konsensusin e rëndësishëm të arritur nga dy liderët, për të përjashtuar ndërhyrjet, për të rifilluar shkëmbimet e bashkëpunimin në fusha të ndryshme dhe për të promovuar zhvillimin e shëndetshëm, të qëndrueshëm e të vazhdueshëm të lidhjeve dypalëshe.
Nga ana e saj, Anand tha se vizita e kryeministrit Carney në Kinë ishte shumë e suksesshme dhe ka nisur një epokë të re në marrëdhëniet kanadezo-kineze.
Ajo e falënderoi palën kineze për ofrimin e hyrjes pa viza për qytetarët kanadezë dhe shprehu shpresën që të dyja palët do të forcojnë dialogun e bashkëpunimin, do të shtojnë shkëmbimet njerëzore dhe do t’i çojnë përpara marrëdhëniet dypalëshe në një drejtim pozitiv dhe të qëndrueshëm.
