Udhëtarët shihen duke kaluar me makinë pranë Pallatit Potala në Lhasa, Xizang më 3 korrik 2025. Gjatë sezonit kulmor të udhëtimeve verore, udhëtimet me makinat e veta. në Xizang janë një zgjedhje gjithnjë e më popullore për pushime. /VCG
Sistemi hekurudhor kinez ka krijuar një shërbim të ri veror që u mundëson udhëtarëve të transportojnë automjetet e tyre në destinacionet turistike, për të bërë kështu turizëm me makinat e veta.
Sipas këtij shërbimi, udhëtarët dhe makinat e tyre transportohen veças, por bashkohen kur mbërrijnë në destinacion.
Zonja Zhang Rui, nga Chongqing-u, kishte planifikuar të udhëtonte me makinën e vet në Lhasë me fëmijën e saj, por largësia e madhe dhe kushtet e vështira të rrugës përbënin një sfidë fizike.
“Udhëtimi në një drejtim me automjetin tënd nga Chongqing-u në Lhasa zgjat mbi 2 000 kilometra dhe mund të duhen katër ose pesë ditë. Kjo më duket se është shumë e lodhshme dhe kushtet janë të vështira,” shpjegoi Zhang.
Prandaj, kur mësoi për shërbimin e ri të transportit hekurudhor të automjeteve, ajo menjëherë bëri një rezervim që makina e saj të transportohej me tren, ndërsa ajo të udhëtonte për në Lhasa me tren ose aeroplan. Ajo do të ribashkohej me makinën e vet në destinacion pas mbërritjes.
“Kam një kamionetë, dhe kostoja e transportit të saj nga Chongqing-u për në Lhasa nëpërmjet hekurudhës është 4 400 juanë (616 dollarë). Në krahasim me udhëtimin me makinën time, kjo zgjedhje më kursen mbi 40 për qind të shpenzimeve, si karburanti, taksat dhe strehimi, ndërkohë që më kursen edhe kohë,” shtoi Zhang.
Jian Changyan, një zyrtar që punon në Qendrën Logjistike Hekurudhore të Chongqing-ut, u shpreh: “Gjatë pushimeve verore, kemi krijuar një linjë kushtuar transportit hekurudhor të makinave nga Chongqing-u në Lhasa. Në këtë linjë kryhen dy udhëtime në javë, me një kohëzgjatje udhëtimi të parashikuar gjashtë deri në tetë ditë.”
Linjat e transportit të makinave kanë nisur edhe nga Lhasa për në disa qytete të tjera, duke përfshirë Chongqing-un, Chengdu-në, Pekinin dhe Shangain.
Burimi ©CGTN
