Foto nga VCG
Ekonomia kineze ruajti prirjen e zhvillimit të qëndrueshëm dhe përmirësimit gjatë tetorit, ndërsa faktorët e rinj nxitës të rritjes ekonomike vazhduan të forcohen, sipas të dhënave zyrtare me frekuencë të lartë mbi konsumin, tregtinë dhe investimet, të publikuara të premten.
Sipas Qendrës Kombëtare të Informacionit pranë Komisionit Kombëtar të Zhvillimit dhe Reformës, të dhënat masive mbi konsumin në dyqanet fizike treguan se vlera e pagesave për konsum u rrit me 2.6 % në tetor, krahasuar me të njëjtën periudhë të vitit të kaluar.
Geng Dewei, studiues i asociuar në departamentin e zhvillimit të të dhënave masive pranë kësaj qendre, u shpreh se politikat e ndryshme për nxitjen e konsumit vazhdojnë të japin rezultate, duke mbështetur rritjen e qëndrueshme të tregut të konsumit.
“Konsumi i shërbimeve në fusha si veshmbathja, ushqimi, strehimi, transporti dhe turizmi është përmirësuar njëkohësisht, ndërsa mundësitë dhe format e ndryshme të konsumit janë zgjeruar vazhdimisht”, tha Geng.
Të dhënat treguan gjithashtu që kapaciteti mbajtës i anijeve të mallrave që u nisën nga portet kryesore kineze u ngrit me 59.1 % në tetor, në bazë vjetore, me një përshpejtim prej 5.9 pikë përqindjeje krahasuar me shtatorin.
Foto nga VCG
Në fushën e investimeve, vlera e kontratave të ofertave të fituara për projektet e infrastrukturës së re, të lidhura me kapacitetin kompjuterik dhe të dhënat, u shtua me 45.4 % krahasuar me të njëjtën periudhë të vitit të kaluar. Ndërkohë, investimet kapitale në fusha të teknologjisë së përparuar, si inteligjenca artificiale dhe robotët humanoidë, u rritën 307.4 %.
Geng theksoi se efektet e politikave për stabilizimin e investimeve po bëhen gradualisht të dukshme, ndërsa fondet e dhëna po shndërrohen në përparim konkret të projekteve dhe struktura e investimeve po përmirësohet.
Në një mbledhje ekzekutive të Këshillit të Shtetit, të zhvilluar javën e kaluar, u bë thirrje për përshpejtimin e ndërtimit dhe zbatimit të projekteve madhore dhe të “gjashtë rrjeteve” të infrastrukturës së vendit, që përfshijnë rrjetet e ujësjellësit, energjisë elektrike, kapacitetit kompjuterik, komunikimit, tubacioneve nëntokësore urbane dhe logjistikës.
Foto nga VCG
Në mbledhje u kërkua gjithashtu forcimi i besimit dhe përshpejtimi i zbatimit të politikave, për të siguruar përmbushjen e objektivave kryesore të zhvillimit ekonomik e shoqëror të vendit për sivjet.
Kina ka vendosur si objektiv për vitin 2026 një rritje ekonomike prej 4.5 % deri në 5 %, duke synuar rezultate edhe më të mira në praktikë. Produkti i Brendshëm Bruto (PBB) i Kinës u rrit me 4.5% në tremujorin e tretë të vitit 2026, krahasuar me 4.3 % në tremujorin e dytë.
