Foto nga VCG
Zëvendësministri i Jashtëm kinez Ma Zhaoxu bëri thirrje të premten për forcimin, dhe jo dobësimin, e rolit të Kombeve të Bashkuara (OKB), duke thënë që reformat janë të nevojshme për ta ndihmuar këtë organizatë botërore të trajtojë sfidat globale.
“Vitet e fundit na kanë kujtuar vazhdimisht nëpërmjet krizave të mëdha se roli i OKB-së duhet të forcohet, e jo të zvogëlohet, dhe statusi i saj duhet të ruhet e jo të zëvendësohet,” tha Ma në një konferencë shtypi mbi veprimtaritë në përkujtim të 80-vjetorit të fitores së Luftës së Rezistencës të Popullit Kinez kundër Agresionit Japonez dhe të Luftës Antifashiste Botërore.
Ai deklaroi që efektshmëria e OKB-së varet në mbështetjen e Kartës së saj, si edhe në respektimin e ligjit ndërkombëtar dhe të normave bazë të marrëdhënieve ndërkombëtare nga shtetet anëtare.
Ma shtoi se nevojiten reforma për ta ndihmuar këtë organizatë të reagojë më mirë ndaj sfidave globale, veçanërisht duke rritur përfaqësimin dhe duke forcuar zërin e vendeve në zhvillim në çështjet ndërkombëtare.
Foto nga VCG
Ky vit shënon 80-vjetorin e fitores së Luftës së Dytë Botërore nga forcat e Aleancës dhe gjithashtu themelimin e OKB-së, një pasojë e drejtpërdrejtë e luftës.
“Për tetë dekada, OKB-ja ka mbajtur aspiratat e popujve anembanë botës për paqe e zhvillim dhe mbetet organizata ndërqeveritare më universale, me autoritet më të madh dhe më përfaqësuese,” u shpreh numri dy i diplomacisë kineze.
Ai vuri në dukje që, me gjithë përparimet në qytetërimin njerëzor, vizioni i Kartës së OKB-së mbetet larg nga përmbushja, duke u dëmtuar veçanërisht nga unilateralizmi i disa vendeve të caktuara, tërheqja e pamatur nga traktatet e organizatat dhe përdorimi në mënyrë përzgjedhëse i OKB-së.
Foto nga VCG
Praktika të tilla, theksoi Ma Zhaoxu, kanë dëmtuar seriozisht rendin ndërkombëtar.
Kina udhëheq zbatimin e multilateralizmit të vërtetë dhe mbështet fuqimisht OKB-në në luajtjen e një roli qendror në çështjet ndërkombëtare, tha zëvendësministri i Jashtëm kinez.
