foto nga VCG
Sistemi satelitor i navigimit BeiDou së shpejti do t’i nënshtrohet një përmirësimi në orbitë për t’i mundësuar atij të ofrojë shërbime me cilësi më të lartë, njoftoi Zyra Kineze e Navigimit Satelitor (CSNO), shkruan “Xinhua”.
Ky përmirësim do të ndikojë në optimizimin e statusit operativ të disa satelitëve.
Zyra bëri të ditur se do të forcojë vazhdimisht koordinimin dhe testimin e satelitëve në orbitë, si dhe do të monitorojë dhe mirëmbajë performancën e sistemit, për të siguruar një përvojë pozitive të përdoruesit.
Si një sistem global i navigimit satelitor i pjekur, plotësisht funksional dhe me performancë të lartë, sistemi aktualisht ka 50 satelitë operativë në orbitë.
Ai arrin një saktësi pozicionimi global më të mirë se 10 metra, saktësi matjeje të shpejtësisë më të mirë se 0.2 metra për sekondë dhe saktësi kohore brenda 20 nanosekondave, vuri në dukje CSNO-ja.
Përmes sinjalit të shërbimit të Pozicionimit të Pikës Precize (PPP), ai mund të realizojë saktësi pozicionimi horizontal më të mirë se 0.3 metra dhe saktësi vertikale më të mirë se 0.6 metra.
Sistemi satelitor i navigimit BeiDou është integruar thellësisht në zhvillimin ekonomik dhe shoqëror të Kinës dhe vazhdimisht ofron shërbime pozicionimi, navigimi dhe përcaktimi të kohës me precizion të lartë për përdorues të ndryshëm, bëri të ditur CSNO-ja.
