Foto: Jimmy Lai duke hipur në një makinë të Departamentit të Shërbimeve Korriguese ndërsa largohet nga Gjykata e Apelit Përfundimtar pas një seance dëgjimi për lirim me kusht në Hong-Kong të Kinës Jugore, 1 shkurt 2021. / VCG
Kushdo që guxon të sfidojë ligjet që mbrojnë sigurinë kombëtare do të ndëshkohet ashpër, tha të hënën Zyra e Çështjeve të Hong-Kongut dhe Makaos e Këshillit të Shtetit në përgjigje ndaj dënimit nga Gjykata e Lartë e Rajonit të Posaçëm Administrativ të Hong-Kongut (HKSAR) e Jimmy Lai-t, një nxitës i trazirave antikineze në HKSAR, me 20 vjet burgim të hënën në mëngjes.
Dënimi i Lai-t demonstron plotësisht vendosmërinë e fortë të HKSAR-it për të mbrojtur sigurinë kombëtare, theksoi Zyra në një deklaratë, duke shtuar se veprimet dhe veprimtaria e Lai-t kanë shkelur seriozisht ligjin e sigurisë kombëtare të Hong-Kongut dhe ligjet përkatëse të HKSAR-it, kanë sfiduar rëndë vijën fundore të parimit “Një vend, dy sisteme”, kanë ndikuar në rendin kushtetues të HKSAR-it dhe kanë dëmtuar seriozisht begatinë dhe qëndrueshmërinë e Hong-Kongut.
Si planifikues kryesor, organizator dhe pjesëmarrës në një varg trazirash antikineze, veprimet e Lai-t i kanë shkaktuar dëm të madh HKSAR-it dhe vendit, tha Zyra, duke shtuar që publiku e ka ditur prej kohësh se Lai nuk ka qenë kurrë një i ashtuquajtur “luftëtar për lirinë, demokracinë dhe të drejtat e njeriut”, por një dëmtues i interesave themelore të vendit dhe mirëqenies së banorëve të Hong-Kongut.
“Ne e mbështesim fuqimisht HKSAR-in në përmbushjen e përgjegjësisë së vet kushtetuese për të mbrojtur sigurinë kombëtare,” u shpreh Zyra, duke vënë në dukje se do të goditen të gjitha veprimet e veprimtaritë që rrezikojnë sigurinë kombëtare dhe do të mposhten të gjitha përpjekjet për të dëmtuar përparimin e Hong-Kongut nga qeverisja në begati dhe për të sjellë trazira në Hong-Kong për të frenuar Kinën.
