Foto nga Universiteti Lanzhou
Shkencëtarët kinezë kanë zhvilluar një grup të dhënash mbi kullotat e kultivuara të Rrafshnaltës Qinghai-Xizang, duke përdorur informacione nga satelitët me sensorë, për të përmirësuar mbrojtjen ekologjike të “çatisë së botës”.
Studimi u krye nga studiues të Universitetit Lanzhou, Universitetit të Pekinit dhe Akademisë Kineze të Shkencave. Rezultatet u botuan në revistën Earth System Science Data.
Studimi zbuloi llojet, shpërndarjen dhe ndryshimet historike të kullotave të kultivuara në Rrafshnaltën Qinghai-Xizang, sipas Universitetit Lanzhou.
Lloje të ndryshme të kullotave në rrafshnaltën Qinghai-Xizang/Foto nga Universiteti Lanzhou
“Studimi sistematik i modelit hapësinor të kullotave të kultivuara në rrafshnaltën Qinghai-Xizang, ka rëndësi të madhe për menaxhimin ekologjik të rrafshnaltës”, tha He Jinsheng, profesor nga Universiteti Lanzhou dhe drejtues i studimit.
Përmbledhja e të dhënave dhe studimi përkatës mund të mbështesin zhvillimin e qëndrueshëm të kullotave dhe mbarështimin e kafshëve në rrafshnaltë. Gjithashtu mund të kontribuojë në mbrojtjen ekologjike dhe restaurimin e rrafshnaltës, përmes menaxhimit të përmirësuar të mbarështimit të bagëtive, shtoi He.
Kullotat e kultivuara janë zona ku bimë specifike foragjere si barërat dhe bishtajoret, mbillen dhe menaxhohen qëllimisht për të ushqyer bagëtinë ndërsa kullotat natyrore zhvillohen natyrshëm me ndërhyrje minimale njerëzore.
“Kullotat luajnë një rol thelbësor në ruajtjen e karbonit, qarkullimin e ujit dhe lëndëve ushqyese në rrafshnaltë, duke mbrojtur biodiversitetin, duke rregulluar ekuilibrin e energjisë dhe duke mbështetur jetesën e blegtorëve”, shpjegoi He.
Foto nga Universiteti Lanzhou
Zhvillimi i kullotave të kultivuara ndihmon në zbutjen e degradimit të rrafshnaltës, të shkaktuar nga ndryshimet klimatike dhe aktivitetet njerëzore gjatë dekadave të fundit.
Për të kuptuar më mirë kullotat e pllajës, ekipi i kërkimit krijoi një set të dhënash me harta të kullotave të kultivuara për provincën Qinghai dhe Rajonin Autonom Xizang që mbulojnë periudhën nga viti 1988 deri në vitin 2021, duke përdorur të dhëna satelitore tele-sensor.
Më pas ata kryen një studim tre-vjeçar nëpër pllaja dhe identifikuan llojet kryesore të kullotave të kultivuara.
Studimi tregoi se zona e kullotave të kultivuara është zgjeruar ndjeshëm midis viteve 1988 dhe 2021. Deri në vitin 2021, Qinghai dhe Xizang kishin një total prej 1.57 milion hektarësh kullota të kultivuara, me Qinghai që përbënte 70% dhe Xizang rreth 30%.
Metoda për identifikimin e kullotave të kultivuara, e zhvilluar në këtë studim, mund të mbështesë kërkimin shkencor, hartimin e politikave, ruajtjen ekologjike dhe menaxhimin e kullotave, sipas He.
Kullota në rrafshnaltën Qinghai-Xizang/Foto nga VCG
“Ekipi i kërkimit do të kryejë një vlerësim shkencor të efekteve ekologjike dhe mjedisore që vijnë nga konvertimi i kullotave natyrore në kullota të kultivuara,” tha He.
Burimi ©CGTN
