Foto nga VCG
Në mbarë Kinën ardhja e tetorit solli një atmosferë të veçantë festive. Dita Kombëtare është shndërruar në një nga periudhat më të gjata të pushimeve gjatë vitit. Gjatë kësaj “Jave të Artë” miliona njerëz udhëtojnë nëpër mbarë vendin.
Pushimet po ofrojnë një pamje të gjallë të Kinës, ku ndjenjat e forta ndaj atdheut ndërthuren me një treg aktiv konsumi, duke pasqyruar gjallërinë dhe qëndrueshmërinë e zhvillimit me cilësi të lartë.
Ndjenja e krenarisë kombëtare është bërë një nga temat e spikatura të pushimeve të Festës Kombëtare. Shumë udhëtarë vizitojnë vende simbolike, ndjekin gjurmët e historisë revolucionare dhe i ndërthurin udhëtimet me përvoja kulturore më të thella.
Rezervimet për “turizmin e kuq” janë rritur gjithashtu ndjeshëm krahasuar me një vit më parë.
Shumë familje po i përfshijnë këto vende historike në itineraret e tyre të pushimeve.
Ky vit shënon 90-vjetorin e fitores së Marshimit të Madh të Ushtrisë së Kuqe. Në kontenë Yudu të provincës Jiangxi të Kinës Lindore, parku përkujtimor që shënon pikënisjen e Marshimit të Madh të Ushtrisë së Kuqe Qendrore ka tërhequr një numër të madh nxënësish dhe turistësh. Gjatë pushimeve shtatëditore pritet që këtu të vijnë afro 300 000 vizitorë.
Foto nga VCG
Përtej vizitave tradicionale, përvojat përjetuese po ndryshojnë gjithashtu mënyrën e konsumit gjatë pushimeve, ndërsa ofertat kulturore dhe turistike po bëhen gjithnjë e më të larmishme.
Në Chongqing të Kinës Perëndimore, disa restorante po ndërthurin hotpot-in me përvoja të frymëzuara nga portet e qytetit, trashëgimia industriale dhe kampingu në natyrë.
Foto nga VCG
Në Chengdu të provincës Sichuan të Kinës Jugperëndimore, vizitorët mund të marrin pjesë edhe në aktivitete që kombinojnë fluturimet në lartësi të ulët me përvoja praktike, si peshkimi dhe përgatitja e ushqimeve tradicionale, duke përjetuar nga afër jetën në fshat.
Në tre ditët e para të pushimeve, nga 1 deri më 3 tetor, numri i vizitorëve dhe të ardhurat në 78 rrugët kryesore tregtare dhe zonat e biznesit të monitoruara nga Ministria e Tregtisë e Kinës u rritën përkatësisht me 3.4 % e 5.3 % krahasuar me të njëjtën periudhë të vitit të kaluar.
Programi qeveritar për zëvendësimin e mallrave të vjetra të konsumit me të reja solli shitje me vlerë 19.63 miliardë juanë (rreth 2.91 miliardë dollarë) gjatë së njëjtës periudhë, duke krijuar përfitime për 3.48 milionë konsumatorë.
Foto nga VCG
Edhe tregu kinematografik gjatë pushimeve po krijon mundësi të reja për bizneset.
Filmat e përshtatshëm për familjen janë kthyer në një element tërheqës kryesor gjatë pushimeve të Ditës Kombëtare të këtij viti, duke përfshirë animacione, trillerë krimi, komedi e drama me tema shoqërore, për shikues të të gjitha brezave.
Në të njëjtën kohë, kinematë po shkojnë përtej shfaqjes tradicionale të filmave. Në një kinema në distriktin Nanshan të Shenzhen-it, në provincën Guangdong të Kinës Jugore, vizitorët mund të gjejnë gjithashtu një librari qytetëse, spa për kokën, si edhe një zonë për sportet elektronike, duke u dhënë mundësi të lexojnë, të çlodhen ose të argëtohen para ose pas filmit.
