Foto nga VCG
Kina krijoi gjithsej 10.52 milionë vende të reja pune në zonat urbane gjatë nëntë muajve të parë të vitit 2026, duke përmbushur 87.8% të objektivit vjetor të vendit, bëri të ditur të shtunën një zyrtar i Ministrisë së Burimeve Njerëzore dhe Sigurimeve Shoqërore.
Norma mesatare e papunësisë së anketuar në zonat urbane ishte 5.2% gjatë tetë muajve të parë të vitit, çka tregon se situata e përgjithshme e punësimit mbeti e qëndrueshme, deklaroi Li Zhong, zëvendësministër i Burimeve Njerëzore dhe Sigurimeve Shoqërore, në një konferencë për shtyp të organizuar nga Zyra e Informacionit e Këshillit të Shtetit në Pekin.
Li bëri të ditur se Kina do të ndërmarrë një sërë masash për të mbështetur punësimin, duke përfshirë programe të posaçme për të diplomuarit universitarë dhe të rinjtë e tjerë, si dhe masa për përmirësimin e cilësisë së punësimit për punonjësit me orare fleksibël dhe ata të angazhuar në forma të reja punësimi.
Foto nga VCG
Nismat e tjera përfshijnë nxitjen e punësimit në përputhje me zhvillimin e inteligjencës artificiale, zgjerimin e trajnimeve profesionale, mbështetjen e punësimit të punëtorëve migrantë dhe përmirësimin e aksesit në shërbimet publike cilësore të punësimit, shtoi Li.
Ai theksoi se Kina do të vazhdojë t’i japë përparësi punësimit dhe të përpiqet të arrijë një nivel më të lartë të punësimit të plotë dhe cilësor.
Li bëri të ditur gjithashtu se Ministria e Burimeve Njerëzore dhe Sigurimeve Shoqërore do të bashkëpunojë me departamentet përkatëse për hartimin e dokumenteve të politikave që synojnë nxitjen e punësimit përmes zhvillimit të sektorit të shërbimeve, duke forcuar rolin e tij si burimi kryesor i krijimit të vendeve të punës.
Sipas të dhënave të Zyrës Kombëtare të Statistikave, sektori i shërbimeve është shndërruar në motorin kryesor të krijimit të vendeve të punës në Kinë. Në fund të vitit 2025, ky sektor përfshinte rreth 50% të fuqisë punëtore të vendit, krahasuar me 48.8% një vit më parë.
Foto nga VCG
Vitet e fundit, me zgjerimin e shpejtë të sektorit të shërbimeve, janë shfaqur forma të reja punësimi, si prezantuesit e transmetimeve të drejtpërdrejta në internet, shpërndarësit e porosive dhe drejtuesit e automjeteve të shërbimeve të transportit përmes platformave digjitale, duke diversifikuar më tej tregun e punës.
