Foto: Grupi i parë i ndihmave humanitare emergjente të ofruara nga qeveria kineze për Venezuelën niset nga Aeroporti Ndërkombëtar i Pekinit, më 5 korrik 2026. /VCG
Kina është e gatshme të vazhdojë t’i ofrojë Venezuelës mbështetje dhe ndihmë të mëtejshme, në përputhje me zhvillimet më të fundit të situatës pas tërmetit, deklaroi të martën zëdhënësja e Ministrisë së Jashtme të Kinës, Mao Ning.
Ajo i bëri këto komente gjatë konferencës së rregullt për shtypin duke iu përgjigjur një pyetjeje lidhur me tërmetet që goditën Venezuelën.
Foto nga VCG
Mbrëmjen e 24 qershorit, Venezuela u godit nga tërmetet më të fuqishme në më shumë se një shekull. Dy tërmete me magnitudë mbi 7 ballë ndodhën brenda një minute. Deri më tani, fatkeqësia ka shkaktuar 3 342 viktima dhe 16 740 të plagosur.
Mao Ning tha se Kina po ndjek nga afër situatën në Venezuelë. Përveç ndihmës financiare emergjente të ofruar më herët, qeveria kineze ka premtuar edhe 100 milionë juanë (rreth 14,7 milionë dollarë amerikanë) grant ndihme emergjente. Ndërkohë, Shoqata e Kryqit të Kuq të Kinës i ka dhënë 300.000 dollarë amerikanë ndihmë financiare emergjente Kryqit të Kuq të Venezuelës.
Foto nga VCG
Ajo bëri të ditur se të hënën, grupi i parë i ndihmave humanitare emergjente të qeverisë kineze, që përfshin gjeneratorë, automjete për pastrimin e ujit, tenda dhe batanije, mbërriti në Venezuelë.
Sipas zëdhënëses, Kina ka vënë gjithashtu në dispozicion imazhe satelitore të zonave të goditura nga fatkeqësia, ndërsa ndërmarrjet kineze që operojnë në Venezuelë dhe komunitetet kineze jashtë vendit kanë dhuruar sasi të konsiderueshme makinerish, pajisjesh dhe ushqimesh për të mbështetur përpjekjet e ndihmës.
