Robotët katërkëmbësh të krijuar nga universitetet kineze paraqiten në Panairin e 25-të Ndërkombëtar të Industrisë të Kinës në Shangai, më 23 shtator 2025. / VCG
Organi më i lartë rregullator i pronësisë intelektuale i Kinës njoftoi të hënën se ka përfunduar shqyrtimin e parë të mbi 1.3 milion patentave të mbajtura nga universitetet dhe institucionet kërkimore në mbarë vendin.
Në këtë proces u identifikuan 680 000 patenta shpikjesh me potencial të lartë komercializimi, të cilat u lidhën me 460 000 kompani, në përpjekje për ta futur inovacionin nga laboratori në treg.
Ky shqyrtim i patentave është pjesë e një plani të veçantë veprimi për transformimin dhe shfrytëzimin e patentave, i miratuar nga Këshilli i Shtetit në vitin 2023. Kategorizimi dhe rigjallërimi i patentave ekzistuese në universitetet dhe institucionet kërkimore është një nga detyrat kryesore të këtij plani. Gjatë tre vjetëve të fundit, rreth 80 000 patenta shpikjesh nga mbi 2 700 universitete dhe institucione kërkimore në tërë vendin kanë hyrë në treg.
Një grup kërkimor nga Universiteti i Pekinit / Xinhua
“Deri në fund të vitit 2025, normat e industrializimit të këtyre patentave nga universitetet dhe institutet kërkimore arritën përkatësisht 10.1 % e 17.2 %, duke pasur një përmirësim më të madh në krahasim me periudhën para fillimit të planit të veprimit,” tha në një konferencë për shtypin Hu Wenhui, zv.komisioner i Administratës Kombëtare të Pronësisë Intelektuale të Kinës.
Hu shtoi se plani i veprimit ishte largpamës, me një grup patentash për teknologjitë thelbësore kyçe në industritë e orientuara drejt së ardhmes, si teknologjia kuantike, bioprodhimi, ndërfaqet tru-kompjuter dhe teknologjia e komunikimit 6G, duke hedhur një themel të fortë për komercializimin e patentave me vlerë të lartë.
foto nga VCG
Kina është bërë vendi i parë me mbi 5 milionë patenta shpikjesh të brendshme të vlefshme, ndërsa aplikimet e saj për patenta ndërkombëtare kanë kryesuar në botë për gjashtë vjet radhazi. Megjithatë, shkalla e industrializimit të patentave të shpikjeve në Kinë mbetet e ulët, veçanërisht në universitetet dhe institucionet kërkimore. Para këtij plani veprimi të posaçëm, të dhënat e vitit 2022 tregojnë se shkalla e industrializimit për patentat e shpikjeve të universiteteve në Kinë ishte vetëm 3.9 %, duke lënë shumë teknologji të patentuara të papërdorura.
