Foto nga VCG
Ministri i Jashtëm i Iranit, Seyed Abbas Araghchi, njoftoi të premten që, në përputhje me armëpushimin në Liban, kalimi për të gjitha anijet tregtare përmes Ngushticës së Hormuzit është shpallur “plotësisht i hapur” për periudhën e mbetur të armëpushimit midis Iranit dhe ShBA-së.
Araghchi e tha këtë në një postim në platformën e mediave sociale X, pasi një armëpushim 10-ditor midis Izraelit dhe Libanit hyri në fuqi pas më shumë se një muaji përshkallëzimi të konfliktit midis Izraelit dhe “Hezbollahut”, i cili ka marrë mbi 2 000 jetë njerëzish.
Ai theksoi se anijet mund të kalojnë në ngushticë nëpërmjet rrugës së koordinuar të njoftuar më parë nga Organizata Portuale dhe Detare e Iranit.
Në reagimin e tij, presidenti i ShBA-së, Donald Trump, e falënderoi Iranin për njoftimin e rihapjes së plotë të Ngushticës së Hormuzit.
Ndërkohë, agjencia shtetërore e lajmeve IRIB citoi një zyrtar të lartë ushtarak, sipas të cilit anijet ushtarake janë të ndaluara të kalojnë nëpër ngushticë dhe vetëm anijet civile mund të kalojnë nëpër rrugë të caktuara dhe me lejen e Marinës së Trupave të Gardës së Revolucionit Islamik të Iranit.
Teherani e shtrëngoi kontrollin mbi Ngushticën e Hormuzit, duke u mohuar kalimin e sigurt anijeve që i përkasin ose janë të lidhura me Izraelin dhe Shtetet e Bashkuara, pasi këto dy vende nisën sulme të përbashkëta ndaj Iranit më 28 shkurt.
Shtetet e Bashkuara kanë vendosur gjithashtu një bllokadë në ngushticë, duke parandaluar kalimin e anijeve që udhëtojnë për në dhe nga portet iraniane, pas dështimit të bisedimeve të paqes midis delegacionit të iranian dhe atij amerikan në kryeqytetin e Pakistanit Islamabad fundjavën e kaluar.
