Foto nga VCG
Forumi Veror i Davosit 2026, një takim global në ballë të inovacionit ekonomik, i njohur gjithashtu edhe si Takimi i 17-të Vjetor i Kampionëve të Rinj i Forumit Ekonomik Botëror (FEB), do të mbahet nga 23 deri më 25 qershor në qytetin portual Dalian në provincën Liaoning të Kinës Verilindore.
Në kohën kur ekonomia globale gjendet përpara pasigurive në rritje, tensioneve gjeopolitike dhe ndryshimeve të shpejta teknologjike, forumi i këtij viti do të mbledhë mbi 1700 përfaqësues të biznesit, qeverive, organizatave shoqërore dhe qarqeve akademike, si dhe të kompanive në rritje të shpejtë, për t’u fokusuar në zgjidhje praktike për sfidat e reja të rritjes.
“FEB-i gjithmonë i ka bashkuar udhëheqësit e palëve të ndryshme për të përballuar sfidat kryesore që ndikojnë botën duke kërkuar zgjidhje nëpërmjet dialogut dhe bashkëpunimit,” tha Alois Zwinggi, presidenti i përkohshëm dhe drejtori ekzekutiv i FEB-it.
Forumi i këtij viti, me temën “Inovacioni në shkallë të gjerë”, do të shqyrtojë se si teknologjitë e reja mund të transformohen në përparime ekonomike dhe shoqërore.
Agjenda përqendrohet rreth pesë temave kryesore: tregtia në ndryshim, kapitulli i ardhshëm i Kinës, teknologjia në ekonominë reale, vendet e punës për brezin e ardhshëm dhe tranzicioni energjetik si burim i konkurrueshmërisë.
Gim Huay Neo, drejtorja menaxhuese e FEB-it, tha para forumit se përparimet e shpejta në inteligjencën artificiale, robotikë, teknologjitë kuantike, bioprodhim e fusha të tjera të inovacionit, po riformësojnë sektorët e ndryshëm, duke përfshirë prodhimin, transportin, shëndetësinë, median etj.
“Teknologjia i ka ndryshuar rrënjësisht prodhimin, konsumin, punën dhe mënyrën tonë të jetesës, duke i shtyrë pandërprerë kufijtë që dikur konsideroheshin fantastiko-shkencorë”, tha ajo, duke vënë në dukje se arritja e inovacionit në shkallë të gjerë kërkon përpjekje të bashkërenduara në hartimin e politikave, ndërtimin e infrastrukturës, përgatitjen e talenteve dhe bashkëpunimin ndërsektorial.
Ky forum do të shfaqë përdorimin praktik të inteligjencës artificiale nëpërmjet MINDS, një program që identifikon dhe paraqet zgjidhjet e inteligjencës artificiale.
Në sfondin e përparimit të shpejtë teknologjik, ndërveprimet njerëzore, duke përfshirë besimin, komunikimin, bashkëpunimin dhe punën në grup, po bëhen më të rëndësishme se kurrë, u shpreh Gim.
Në prag të forumit, FEB-i publikoi Listën e Pionierëve të Teknologjisë për vitin 2026 dhe së shpejti do të publikojë raportin e fundit mbi 10 teknologjitë më të reja në zhvillim.
Përveç teknologjisë, forumi do të diskutojë mbi kultivimin e frymës së sipërmarrjes dhe aftësive për të ardhmen, përshpejtimin e tranzicionit energjetik global dhe rivendosjen e ekosistemit duke ruajtur konkurrueshmërinë ekonomike.
Forumi ka publikuar gjithashtu Treguesin e Tranzicionit të Energjisë 2026. Kjo është hera e 17-të që publikohet ky tregues, i cili vlerëson gatishmërinë e vendeve të ndryshme për tranzicionin energjetik duke vlerësuar faktorë të tillë si politikat, standardet, infrastruktura, fondet, talentet dhe teknologjia.
Forumi i këtij viti i kushton vëmendje të posaçme strukturës së inovacionit në zhvillim të shpejtë të Kinës dhe të Azisë, duke u ofruar pjesëmarrësve ndërkombëtarë një vështrim të drejtpërdrejtë mbi transformimin ekonomik të Kinës dhe angazhimin e saj të vazhdueshëm për hapjen me nivel të lartë.
Gim Huay Neo vuri në dukje se Azia ka kontribuuar për rreth 60 % të rritjes ekonomike globale dhe afërsisht dy e treta e bazave prodhuese në botë janë në këtë rajon, ndër të cilat Kina zë rreth 40 %.
Tregu aziatik është plot me gjallëri dhe ka përmasa të mëdha, duke qenë terreni ideal për testimin e ideve dhe teknologjive të ndryshme inovative, shtoi ajo.
Në mbi 200 sesione rreth pesë temave kryesore të forumit, diskutimet do të mbulojnë strategjinë e zhvillimit ekonomik të Kinës dhe zbatimin e Planit të saj të 15-të Pesëvjeçar (2026-2030). Njëkohësisht, do të zhvillohen edhe dy nënforume mbi bashkëpunimin e kapitalit sipërmarrës në kuadër të nismës “Një brez, një rrugë”.
Gao Weiqi, zv.drejtorja e përgjithshme e Departamentit të Bashkëpunimit Ndërkombëtar në Komisionin Kombëtar të Zhvillimit dhe Reformës të Kinës, tha se forumi ofron një platformë të rëndësishme për të ndarë mundësitë e zhvillimit të Kinës me botën.
Ajo vuri në dukje se 2026-a shënon vitin e parë të periudhës së Planit të 15-të Pesëvjeçar të Kinës, gjatë të cilit Kina do të vijojë të nxitë rritjen e qëndrueshme ekonomike dhe përmirësimin industrial për të arritur zhvillimin cilësor.
Sipas saj, Plani i 15-të Pesëvjeçar tregon besimin e Kinës për zhvillimin afatgjatë, ndërsa themeli i fortë ekonomik, qëndrueshmëria dhe kapaciteti inovativ i Kinës do të vazhdojnë t’i ofrojnë siguri dhe vrull zhvillimi ekonomisë globale.
