Më 17 mars 2014, Sekretari i Përgjithshëm i Komiteit Qendror të Partisë Komuniste të Kinës(PKK) Xi Jinping vizitoi Sallën Përkujtimore të Kuadros Model të PKK-së Jiao Yulu, që kishte dedikuar gjithë jetën shërbimit të popullit, Konte Lankao, provincë Henan, Kinë Qendrore./Foto nga Xinhua
Më 1 korrik 2026, partia politike më e madhe në botë mbush 105 vjet. Gjithçka nisi me vetëm 50 anëtarë të bashkuar në një shtëpi në lagjen franceze të Shanghait, ku në vitin 1921 u mblodh Kongresi i Parë Kombëtar i Partisë Komuniste Kineze (PKK). Që nga ai vit e më pas, fizionomia e kombit kinez do të ndryshonte përgjithmonë. Nga ai rreth i vogël me 50 veta, në pak kohë anëtarët dhe mbështetësit u bënë miliona, dhe tre dekada më vonë, më 1 tetor 1949 u bashkuan për të themeluar Republikën Popullore të Kinës, duke i dhënë fund një shekulli poshtërimi dhe duke mposhtur armiq të jashtëm e të brendshëm.
Ata njerëz që themeluan PKK-në dhe luftuan për ta bërë atë, partinë që do të qeveriste të gjithë kinezët, ishin të lodhur nga pushtuesit, nga padrejtësitë, nga kaosi social, nga skamja dhe u bashkuan nën idealin që po i udhëheq edhe sot.
Që nga themelimi i saj në vitin 1921, PKK-ja e ka konsideruar vetëpërmirësimin dhe vetëripërtëritjen si kushte thelbësore për ruajtjen e legjitimitetit politik dhe përgjigjen ndaj sfidave të brendshme dhe ndërkombëtare.
Koncepti i Ndërtimit të Partisë
Koncepti i Ndërtimit të Partisë zë një pozicion qendror në filozofinë politike dhe praktikën organizative të PKK-së. Ai i referohet procesit të vazhdueshëm të forcimit të themeleve ideologjike, kapacitetit organizativ, aftësisë udhëheqëse, dhe disiplinës, me qëllim përfundimtar sigurimin e efektivitetit të saj si forcë qeverisëse e vendit.
Me rastin e 105-vjetorit të themelimit të saj, Xi Jinping, Sekretari i Përgjithshëm i Komitetit Qendror të saj dhe President i Republikës Popullore të Kinës, u ka bërë thirrje anëtarëve të Partisë që të çojnë përpara traditat revolucionare dhe të përpiqen për arritje të reja në udhëtimin e ri. Në fakt, që prej Kongresit të 18-të Kombëtar të PKK-së (2012), Komiteti Qendror i PKK-së ka paraqitur një sërë idesh, mendimesh dhe strategjish të reja mbi vetëqeverisjen e Partisë dhe mbi përpjekjet për të forcuar atë, duke formuar Mendimin e Xi Jinping-ut për Ndërtimin e Partisë. Mendimi i Xi Jinping-ut për Ndërtimin e Partisë është një përbërës i rëndësishëm i ‘Socializmit me Karakteristika Kineze për një Epokë të Re’ dhe ofron udhëzime themelore e një udhërrëfyes veprimi për përparimin në epokën e re. Kjo nuk është një fushatë e përkohshme politike apo një ushtrim i brendshëm administrativ, por një detyrë e përhershme dhe në zhvillim e sipër.
Ndërtimi ideologjik përbën një nga dimensionet më të rëndësishme ku PKK-ja thekson rëndësinë e ruajtjes së unitetit në vlerat politike, objektivat strategjike dhe mirëkuptimin teorik midis anëtarëve të saj. Bindja ideologjike në kontekstin kinez i referohet një besimi të fortë në qëllimet, vlerat dhe misionin historik të drejtimit të vendit. Nga anëtarët e PKK-së pritet jo vetëm të kuptojnë teorinë politike, por edhe t’i përkthejnë këto parime në veprime praktike që përmirësojnë jetën e qytetarëve të zakonshëm. Prandaj, legjitimiteti dhe vitaliteti i Partisë janë të lidhura ngushtë me aftësinë e saj për t’iu përgjigjur nevojave, shqetësimeve dhe aspiratave të popullsisë.
Ndërtimi organizativ përfaqëson një tjetër shtyllë kryesore të konceptit. PKK-ja i kushton rëndësi të konsiderueshme zhvillimit të institucioneve efektive, përmirësimit të mekanizmave të qeverisjes së brendshme dhe forcimit të organizatave të Partisë në nivel kombëtar, provincial, lokal dhe bazë.
Salla Përkujtimore e Kongresit të Parë Kombëtar të Partisë Komuniste të Kinës në Shangai/Foto nga Xinhua
Ndërtimi i disiplinës dhe përpjekjet kundër korrupsionit janë gjithashtu komponentë integralë të konceptit, pasi konsiderohen thelbësore për parandalimin e abuzimeve me pushtetin. Në vitet e fundit, fushatat kundër korrupsionit janë hartuar si pjesë e përpjekjes më të gjerë për të përmirësuar sjelljen e anëtarëve të Partisë, për të rritur llogaridhënien dhe për të përforcuar parimin se anëtarët dhe zyrtarët i nënshtrohen standardeve të larta etike dhe profesionale.
Presidenti Xi është shprehur në lidhje me Partinë që ai drejton se përgjatë historisë së saj, PKK-ja ka qenë në një mendje me njerëzit, ka marrë frymë në të njëjtën frymë si njerëzit dhe ka ndjerë vuajtjen dhe mjerimin me njerëzit. Ideja e shërbimit ndaj popullit zë një vend të veçantë pasi kuptohet si një detyrim moral dhe një përgjegjësi politike. Në këtë kuptim, shërbimi ndaj popullit nuk shihet si bamirësi apo mirëdashje, por si vetë qëllimi i lidershipit politik. Por, arritja individuale është e lidhur me progresin kolektiv dhe theksi në shërbimin ndaj popullit gjithashtu formëson përparësitë e politikave në shkallë të gjerë. Zbutja e varfërisë, rigjallërimi rural, shëndeti publik, arsimi dhe mirëqenia sociale shpesh paraqiten si shprehje praktike të misionit themelues të PKK-së. Suksesi në këto fusha shihet jo vetëm si një arritje ekonomike, por si provë e besnikërisë ndaj themeleve të saj ideologjike. Ndërtimi i Partisë synon të sigurojë që Partia të mbetet e lidhur ngushtë me shoqërinë dhe besnike ndaj misionit të saj origjinal.
Socializmi me karakteristika Kineze dhe ideologjia në veprim
Që nga themelimi i saj, PKK-ja i ka kushtuar rëndësi të madhe aspektit ideologjik, disiplinës organizative dhe trashëgimisë së lidershipit si mekanizma për të siguruar që parimet e saj kryesore dhe objektivat strategjike të qëndrojnë në jetë ndër breza. Prandaj, vazhdimësia shihet si një proces i ripërtëritjes institucionale dhe jo thjesht ruajtje. Ajo kërkon të përshtasë metodat e qeverisjes me realitetet e reja ekonomike dhe shoqërore, duke ruajtur qëndrueshmërinë në drejtimin politik dhe qëllimet e zhvillimit kombëtar.
Të gjitha arritjet e Kinës, si në rrafshin ekonomik, social, politik dhe ato që prekin aspektet më të imta të kombit më të populluar në botë janë të pandashme nga lidershipi i Kinës. Nën udhëheqjen e PKK-së, Kina ka krijuar një sistem ekonomik të tregut socialist dhe ka parë arritje të jashtëzakonshme. Çelësi i suksesit të Kinës është se udhëheqësit kinezë e kanë përshtatur marksizmin me realitetin e vendit të tyre. Dëshira për nisma të mëdha ka qenë përherë në djepin e qytetërimit kinez, por dëshira për nisma të mëdha mund të mos vlejë nëse në krye të punëve të shtetit nuk ka zell për t’i përmbushur ato.
Është e pamohueshme tashmë, pas dekadash rritjeje e mirëqenieje se PKK-ja i ka dhënë popullit një rrugë të pakthyeshme dhe të pathyeshme drejt prosperitetit, e tashmë po marshon drejt ndërtimit të plotë të një shoqërie të begatë. Zhvillimi marramendës i Kinës ka si emërues të përbashkët planifikimet afatgjata e strategjike, dhe vazhdimësia e pushtetit ka siguruar që këto politika të ndiqen, të aplikohen dhe të japin fryte për të gjithë, pa përjashtim.
Lufta kundër korrupsionit përbën një shtyllë tjetër themelore të ndërtimit të partisë. Korrupsioni shihet jo thjesht si një krim ekonomik ose një dështim administrativ, por si një kërcënim i drejtpërdrejtë për legjitimitetin, efektivitetin dhe marrëdhënien e Partisë me njerëzit.
Në Stacionin e Shërbimit Komunitar Jinyuan në Nëndistriktin Jinyang, të qytetit Guiyang të Kinës Jugperëndimore, punonjësit e komunitetit ofrojnë shërbime banorëve/Foto nga Xinhua
Për të adresuar korrupsionin, të cilin Xi e quajti “kërcënimi më i rëndësishëm” për qeverisjen afatgjatë të Partisë, PKK-ja ka nisur gjithashtu një fushatë të paprecedentë kundër tij. Objektivi shtrihet përtej ndëshkimit të keqbërjeve individuale; ai kërkon të krijojë një kulturë politike në të cilën integriteti, përgjegjësia dhe disiplina konsiderohen cilësi të domosdoshme të udhëheqjes. Korrupsioni mund të dobësojë institucionet, të minojë besimin e publikut dhe të rrezikojë stabilitetin shoqëror nëse lihet pa u kontrolluar.
Marrëdhënia midis vazhdimësisë dhe antikorrupsionit është veçanërisht e rëndësishme. Udhëheqja e qëndrueshme politike kërkon besim publik, ndërsa besimi publik varet shumë nga perceptimi se zyrtarët e ushtrojnë pushtetin në mënyrë të përgjegjshme dhe transparente. Në këtë kuptim, luftimi i korrupsionit bëhet një mjet për të ruajtur vazhdimësinë afatgjatë të Partisë dhe për të ruajtur kapacitetin e saj qeverisës.
Në fushatën e saj kundër korrupsionit, PKK-ja mban tolerancë zero, pa zona, grupe ose njerëz të paprekshëm dhe zotohet për mbulim të plotë. Në vitin 2025, autoritetet e inspektimit dhe mbikëqyrjes disiplinore të Kinës në të gjithë vendin ngritën 1 012 000 padi dhe disiplinuan 983 000 individë, duke demonstruar plotësisht vendosmërinë e palëkundur të PKK-së në luftën kundër korrupsionit.
105 vjet lidership dhe rruga e PKK-së drejt Ripërtëritjes Kombëtare
Bota shpesh pyet se si PKK-ja e ka udhëhequr kombin më të populluar në botë nga një shoqëri gjysmë-koloniale, gjysmë-feudale në një vend socialist të begatë, të fortë dhe të gjallë. Përgjigjja qëndron në vizionin afatgjatë të drejtimit politik dhe vendosmërinë e fortë për të realizuar kauzën e madhe të “ndërtimit të plotë të një Kine moderne socialiste dhe arritjes së ‘Ëndrrës Kineze’ të ripërtëritjes kombëtare”, me interesat themelore të popullit kinez në thelb.
Muzeu i Partisë Komuniste të Kinës, Pekin, Kinë/Foto nga VCG
“Vendosja e popullit në qendër” nuk është pra një slogan abstrakt. Është institucionalizuar përmes demokracisë konsultative, kongreseve popullore, qeverisjes bazë, pjesëmarrjes së publikut në vendimmarrjen kryesore dhe kanaleve përmes të cilave deputetët e kongreseve popullore mbajnë kontakt me publikun.
Që nga themelimi i Kinës së Re, PKK-ja e ka udhëhequr popullin kinez duke ndjekur vizionin e saj afatgjatë me vendosmëri dhe veprim të vendosur mbi retorikën. Sot, statusi i PKK-së është shumë i ndryshëm nga viti 1921. Njëqind e pesë vjet më vonë, numri i përgjithshëm i anëtarëve ka arritur në mbi 100 milionë.
Gjatë udhëtimit të saj, PKK-ja ka fituar besimin dhe mbështetjen e popullit kinez. Si e tillë, përparimi i PKK-së përtej shekullit të parë nuk është një ngjarje e zakonshme, por një moment historik. Në historinë politike botërore, pak parti kanë mbijetuar për 100 vjet rresht pa u shpërbërë, dhe akoma më pak kanë vazhduar të lulëzojnë për 105 vjet. Ky besim buron nga performanca e lidershipit në qeverisjen sociale, zhvillimin ekonomik, zbutjen e varfërisë, mbrojtjen e sovranitetit kombëtar, ndër të tjera.
Suksesi i jashtëzakonshëm i Kinës mund të arrihet vetëm nga një parti që mban lidhjet e saj të ngushta me njerëzit. PKK është një parti e popullit dhe ka qenë shumë fleksibël në taktikat dhe strategjitë e saj, por edhe e vendosur në parimet e saj. Është një parti e fuqishme dhe popullore që ka arritur të mishërojë të gjitha aspiratat e njerëzve dhe kombit të saj për prosperitet dhe përparim.
PKK-ja ka treguar vazhdimisht aftësinë e saj pragmatike për të përshtatur politikat e saj pa braktisur objektivat. Eksperimentimi lokal i paraprin zbatimit kombëtar. Politikat e suksesshme zgjerohen. Politikat e pasuksesshme rishikohen ose braktisen. Qeverisja trajtohet si një proces i vazhdueshëm i zgjidhjes së problemeve praktike në vend të mbrojtjes së premtimeve boshe. Planifikimi, zbatimi, dhe raportimet, janë mjetet me të cilat përparon Kina.
Po aq i rëndësishëm ka qenë theksi i Partisë në kultivimin e lidershipit. Qeverisja e një vendi me më shumë se 1.4 miliardë banorë kërkon kapacitet administrativ në një shkallë të jashtëzakonshme. Partia ka theksuar vazhdimisht identifikimin, trajnimin, promovimin dhe mbajtjen e individëve të aftë për të menaxhuar përgjegjësi gjithnjë e më komplekse. Merita, disiplina, përvoja dhe planifikimi afatgjatë janë bërë karakteristika përcaktuese të modelit të qeverisjes së Kinës.
Së fundmi, me ndjenjë përgjegjësie shekullore dhe me aspiratën se po mban mbi supe një mision historik, PKK-ja e paraqet veten jo vetëm si një organizatë politike, por edhe si një strukturë qeverisëse përgjegjëse për zhvillimin kombëtar, avancimin shoqëror dhe planifikimin afatgjatë.
105-vjetori i themelimit të PKK-së është më shumë sesa një moment historik. Ai shënon evolucionin e njërit prej institucioneve politike më të rëndësishme të epokës moderne. Gjatë ekzistencës së saj, Partia e ka udhëhequr Kinën përmes çlirimit kombëtar, ndërtimit të shtetit, modernizimit ekonomik dhe, gjithnjë e më shumë, formësimit të qeverisjes ndërkombëtare.
Institucionet politike, si bartëse dhe zbatuese të vullnetit të popullit, përfaqësojnë ambicien dhe realitetin e një kombi. Dhe qëllimi përfundimtar i një lidershipi të suksesshëm është të kombinojë në mënyrë harmonike aspiratat kombëtare, shoqërore dhe individuale. 105 vjet nga themelimi i saj, PKK-ja po ecën në këto linja.
AIGS
