Një nga tre linjat e reja të prodhimit të fibrave të karbonit me performancë të lartë, të klasit botëror, në qytetin Lianyungang, Provinca Jiaungsu. /CMG
Grupi Kombëtar i Materialeve të Ndërtimit i Kinës (CNBM) vuri të dielën në punë tre linja prodhimi fibrash karboni me performancë të lartë të klasit botëror, duke forcuar aftësinë e furnizimit të vendit me produkte fibrash karboni të nivelit të lartë.
Linjat, të vendosura në bazën e prodhimit “Lianyungang” të filialit të CNBM-së, Kompanisë së Fibrave të Karbonit “Zhongfu Shenying” në provincën Jiangsu të Kinës Lindore, përfshijnë tre kategoritë kryesore të produkteve të fibrave të karbonit: me përdorim të përgjithshëm, me forcë të lartë dhe me modul të lartë.
Shpesh të quajtura si “ari i zi”, fibrat e karbonit kombinojnë peshën e lehtë me forcën e jashtëzakonshme dhe rezistencën ndaj gërryerjes. Fibrat e karbonit përdoren gjerësisht në sektorët strategjikë, duke përfshirë energjinë e re, hapësirën ajrore, inxhinierinë e thellësive detare, eksplorimin e thellë të Tokës, misionet në hapësirën e thellë, mjetet sportive dhe pajisjet elektronike të konsumit.
Linjat e reja përfshijnë një linjë prodhimi të fibrave të karbonit në përmasë të madhe prej 5000 tonësh në vit, një linjë prodhimi të fibrave të karbonit me rezistencë të lartë të gradës T1100 me kapacitet 1000 tonë në vit, si edhe një linjë prodhimi me modul të lartë prej 600 tonësh në vit.
Çdo linjë prodhimi ka një epërsi të veçantë teknologjike. Linja e prodhimit të fibrave të karbonit në përmasë të madhe, e ndërtuar mbi një teknologji pioniere të tjerrjes së lagësht dhe tharjes me ajër, mund të përmirësojë produktet për industrinë e energjisë së erës, duke reduktuar në mënyrë efektive kostot e prodhimit dhe duke përmirësuar ndjeshëm efikasitetin e prodhimit në shkallë të gjerë.
