Foto nga VCG
Në portet dhe terminalet kineze, automjetet me energji të re, robotët industrialë, komponentët e energjisë së erës dhe produkte të tjera të prodhuara me teknologji kineze, po përshpejtojnë depërtimin në tregjet e huaja, duke u bërë një dëshmi e gjallë e “mundësisë së Kinës 2.0”.
Sipas të dhënave të publikuara nga autoritetet kineze të premten, në shtatë muajt e parë të këtij viti, vlera totale e importeve dhe eksporteve të mallrave të Kinës arriti në 30,13 trilionë juanë, me një rritje prej 17,3% krahasuar me të njëjtën periudhë të vitit të kaluar. Eksportet u rritën me 14%, ndërsa importet me 22%. Në korrik, ritmi i rritjes së eksporteve të produkteve të teknologjisë së lartë kaloi 50%, duke kontribuar me gati 60% të rritjes së eksporteve. Sipas mediave të huaja, në një kohë kur proteksionizmi po rritet dhe tregtia globale po ngadalësohet, tregtia e Kinës ka treguar qëndrueshmëri të fortë, ndërsa fusha të avancuara si inteligjenca artificiale kanë shënuar një performancë veçanërisht të spikatur.
Si ka arritur tregtia e jashtme e Kinës të përparojë përballë presioneve? Wang Xiaosong, profesor në Universitetin Renmin të Kinës, thotë se avantazhe të tilla si sistemi i plotë industrial, tregu me përmasa jashtëzakonisht të mëdha, nxitja përmes inovacionit dhe zgjerimi i hapjes ndaj botës së jashtme, kanë ofruar së bashku mbështetje për rritjen e tregtisë së jashtme.
Foto nga VCG
Ndërsa vëllimi i tregtisë së jashtme po rritet në mënyrë të qëndrueshme dhe me ritëm të përshpejtuar, struktura e saj po bëhet gjithnjë e më inovative dhe e gjelbër. Në shtatë muajt e parë, eksportet kineze të automjeteve elektrike, baterive litiumi dhe pajisjeve të prodhimit të energjisë së erës u rritën përkatësisht me 71,2%, 35,8% dhe 34,8%. Eksportet e printerëve 3D dhe robotëve industrialë u rritën përkatësisht me 1,1 herë dhe 13,2%, duke e bërë prodhimin e teknologjisë së lartë një burim të ri të rritjes së eksporteve. Në të njëjtën kohë, eksportet kineze të pajisjeve elektroshtëpiake, si kondicionerët, ventilatorët dhe frigoriferët, vazhduan të rriten, duke u ofruar konsumatorëve në mbarë botën komoditetin dhe përfitimet e produkteve “të prodhuara në Kinë”.
Edhe inovacioni kinez po përshpejton hapin drejt botës. He Jun, president ekzekutiv për rajonin e Azisë Veriore të kompanisë gjermane “KSB”, tha se softuerët për mirëmbajtjen parashikuese të bazuar në teknologjitë digjitale dhe inteligjencën artificiale, të zhvilluar në mënyrë të pavarur nga ekipi i kompanisë në Kinë, jo vetëm që janë pritur mirë në tregun kinez, por janë eksportuar edhe në selinë qendrore në Gjermani. Kjo tregon se Kina po bëhet një burim i rëndësishëm i inovacionit global.
Kina nuk është vetëm “fabrika e botës”, por edhe “tregu i botës”. Në shtatë muajt e parë, ritmi i rritjes së importeve kineze ishte 8 pikë përqindjeje më i lartë se ai i eksporteve. Aktualisht, Kina ka zbatuar politikën e tarifave zero për 63 vende dhe, për 17 vite radhazi, vëllimi i importeve të saj ka renditur i dyti në botë. Zgjerimi i importeve kineze të produkteve dhe shërbimeve cilësore, jo vetëm ndihmon në përmirësimin industrial dhe rritjen e cilësisë së konsumit, por sjell gjithashtu porosi, vende pune dhe mundësi zhvillimi për partnerët tregtarë.
Ndërkohë, “rrethi i miqve” të tregtisë së jashtme të Kinës po zgjerohet vazhdimisht. Në shtatë muajt e parë, importet dhe eksportet e Kinës me më shumë se 180 vende dhe rajone vijuan të rriteshin. Tregtia me ASEAN-in dhe Afrikën u rrit me afro 20%, ndërsa tregtia me Shtetet e Bashkuara u rrit për të katërtin muaj radhazi. Zinxhirët e qëndrueshëm të furnizimit industrial dhe partnerët tregtarë që zgjerohen vazhdimisht po i japin ekonomisë botërore më shumë siguri.
Tregtia e jashtme është një tregues i rëndësishëm i gjallërisë ekonomike. Të dhënat e tregtisë së jashtme të Kinës për shtatë muajt e parë, tregojnë se dinamika e ekonomisë kineze po orientohet drejt sektorëve të rinj, struktura ekonomike po përmirësohet dhe bazat e zhvillimit të qëndrueshëm afatgjatë mbeten të pandryshuara. Kohët e fundit, një sërë institucionesh ndërkombëtare kanë rritur parashikimet e tyre për rritjen ekonomike të Kinës në vitin 2026. Gati 4800 kompani me kapital të huaj shtuan investimet e tyre në Kinë gjatë gjysmës së parë të këtij viti, duke reflektuar gjithashtu besimin e komunitetit ndërkombëtar në ekonominë kineze.
Foto nga VCG
Me zhvillimin njëri pas tjetrit të aktiviteteve të rëndësishme ekonomike dhe tregtare, si Panairi Ndërkombëtar për Tregtinë në Shërbime të Kinës, Panairi Ndërkombëtar i Investimeve dhe Tregtisë dhe Ekspozita Ndërkombëtare e Importit e Kinës, “mundësia e Kinës 2.0” po vazhdon të sjellë përfitime. Faktet tregojnë se të ecësh përkrah Kinës do të thotë të ecësh përkrah mundësive.
