foto nga VCG
Kina ka prezantuar një plan veprimi të posaçëm për të përshpejtuar integrimin e inteligjencës artificiale (IA) në industrinë e saj të softuerëve dhe shërbimeve të teknologjisë së informacionit, me synimin për të riformuar konkurrueshmërinë thelbësore të sektorit.
Plani, i publikuar nga Ministria e Industrisë dhe Teknologjisë së Informacionit, përcakton një udhërrëfyes me dy faza. Deri në vitin 2028, Kina synon të rrisë ndjeshëm nivelin e inteligjencës në industrinë e saj të softuerëve, duke zhvilluar mjete kodimi dhe platforma zhvillimi të standardeve të larta, si dhe duke zgjeruar përdorimin e tyre në më shumë se 20,000 ndërmarrje të mëdha softuerike.
Ndërkohë, plani parashikon gjithashtu krijimin e 100 aplikacioneve model për softuerë të bazuar në agjentë (agent-based software) në industri kyçe dhe mbështetjen e zhvillimit të të paktën pesë projekteve me burim të hapur (open-source) të cilësisë së lartë.
Plani parashikon një ndryshim rrënjësor në integrimin e IA-së me sektorin e softuerëve, duke përfshirë përmirësime të plota inteligjente në sistemet kritike të softuerëve deri në vitin 2030. Programimi i mbështetur nga IA, softuerët me agjentë dhe shërbimet inteligjente, pritet të shfaqen si motorë të rinj rritjeje, të mbështetur nga komunitete “open-source” dhe klasterë industrialë konkurrues në nivel ndërkombëtar.
Aktualisht, IA po transformon rrënjësisht mënyrën se si zhvillohet softueri, pamjen e produkteve dhe mënyrën e ofrimit të shërbimeve, duke u bërë motori kryesor që nxit modernizimin industrial.
Ky plan veprimi është më i fundmi në një seri masash politike, ndërsa Kina përpiqet të integrojë IA-në në të gjithë ekonominë e saj.
Raporti i punës së qeverisë e ka përfshirë nismën “AI Plus” për tre vite radhazi dhe, veçanërisht këtë vit, ka bërë thirrje për “krijimin e formave të reja të ekonomisë inteligjente”.
IA ka evoluar nga një mjet mbështetës në një motor thelbësor të transformimit ekonomik, i cili do të riformojë sistematikisht themelet e funksionimit të ekonomisë, thanë analistët.
Autoritetet parashikojnë se sektori kinez i lidhur me IA-në, do të kalojë vlerën totale prej 10 trilionë juanësh deri në vitin 2030.
