Foto nga MPJ
Ministri i Jashtëm i Kinës Wang Yi u takua të martën në Pekin me Rebeca Grynspan, kandidate për sekretare të përgjithshme të ardhshme të OKB-së.
Grynspan, sekretare e përgjithshme e Konferencës së Kombeve të Bashkuara për Tregti dhe Zhvillim (UNCTAD) dhe ish-nënkryetare e Kosta Rikës, përshkroi vizionin e saj për të ardhmen e Kombeve të Bashkuara, duke thënë se organizata mbetet e pazëvendësueshme, por duhet të përparojë reformat për të ecur me kohën.
Ajo tha se OKB duhet t’i kushtojë më shumë rëndësi paqes, zhvillimit dhe të ardhmes, duke luajtur plotësisht rolin e saj si qendër e sistemit ndërkombëtar.
Duke riafirmuar angazhimin e saj ndaj parimit të një Kine, Grynspan vlerësoi Kinën për mbështetjen e vazhdueshme të multilateralizmit dhe Kartës së OKB-së. Grynspan tha se mezi pret të punojë me Kinën dhe bashkësinë ndërkombëtare, për të forcuar autoritetin e Kombeve të Bashkuara dhe për të ndihmuar në ndërtimin e një të ardhmeje të përbashkët për njerëzimin.
Wang, gjithashtu anëtar i Byrosë Politike të Komitetit Qendror të PKK, tha se komentet e Grynspan pasqyronin një angazhim të vendosur ndaj kauzës së OKB-së, një ndjekje të palëkundur të paqes botërore dhe një kuptim të thellë të shqetësimeve dhe aspiratave të vendeve të Jugut Global.
Kombet e Bashkuara janë një ndërmarrje shekullore, e ndërtuar nëpërmjet përpjekjeve të jashtëzakonshme të bashkësisë ndërkombëtare, theksoi Wang.
Që nga rivendosja e selisë ligjore të Republikës Popullore të Kinës në Kombet e Bashkuara 55 vjet më parë, Kina ka qenë vazhdimisht një mbështetëse dhe ndërtuese e kauzës së OKB-së, vuri në dukje ai.
Wang kujtoi se Kina mori presidencën e radhës të Këshillit të Sigurimit të OKB-së muajin e kaluar, gjatë së cilës ai udhëtoi për në Nju Jork për të kryesuar një takim të nivelit të lartë të Këshillit të Sigurimit. Takimi dha një mesazh të unifikuar në mbështetje të multilateralizmit, respektimit të Kartës së OKB-së dhe përpjekjeve për të rigjallëruar autoritetin e Kombeve të Bashkuara, tha ai.
Posti i sekretarit të përgjithshëm të OKB-së mbart përgjegjësi të konsiderueshme dhe ndikim global, tha Wang, duke shtuar se sekretari i përgjithshëm i ardhshëm duhet të mbështesë Kartën e OKB-së, të demonstrojë kompetencë të jashtëzakonshme, të veprojë me drejtësi dhe integritet, si dhe të mbajë përgjegjësi mbi supe me angazhim dhe vendosmëri.
Si një vend i madh përgjegjës dhe një anëtar i përhershëm i Këshillit të Sigurimit të OKB-së, Kina do të marrë pjesë në përzgjedhjen e sekretarit të përgjithshëm të ardhshëm të OKB-së në një mënyrë konstruktive, vuri në dukje Wang.
Ai shtoi se Kina është e gatshme të punojë me të gjitha palët për të mbrojtur, rigjallëruar dhe forcuar Kombet e Bashkuara.
