Foto nga MPJ
Ministri i Jashtëm i Kinës Wang Yi u takua të dielën në Pekin me sekretarin e Këshillit të Sigurisë së Federatës Ruse Sergei Shoigu.
Wang, që është gjithashtu drejtor i Zyrës së Komisionit Qendror për Punët e Jashtme të PKK-së, përshëndeti vizitën e Shoigu-së në Kinë për një dialog strategjik të përcaktuar nga presidenti rus Vladimir Putin.
Kina dhe Rusia, si vendet më të mëdha fqinje të njëra-tjetrës dhe partnere të gjithanshme strategjike të bashkërendimit për një epokë të re, duhet të mbajnë komunikim të ngushtë mbi çështjet kryesore që kanë të bëjnë me marrëdhëniet dypalëshe, të rrisin mbështetjen e ndërsjellë për çështjet që përfshijnë interesat thelbësore të njëra-tjetrës, si edhe të mbrojnë interesat e tyre përkatëse dhe interesat e përbashkëta, deklaroi Wang.
Që nga fillimi i vitit, peizazhi global ka shënuar ndryshime të shpejta dhe kanë lindur shpesh çështje të sigurisë. Rusia i përmbahet me vendosmëri parimit të “një Kine”, ndjek nga afër lëvizjet e forcave armiqësore që minojnë qëndrueshmërinë në Ngushticën e Tajvanit dhe kundërshton me vendosmëri përpjekjet e Japonisë për të përshpejtuar “rimilitarizimin”. Rusia është e gatshme të vazhdojë mbështetjen e palëkundur të ndërsjellë me Kinën dhe të forcojë bashkëpunimin dypalësh e bashkërendimin brenda kornizave shumëpalëshe si Kombet e Bashkuara, Organizata e Bashkëpunimit të Shangait dhe BRICS, për të ruajtur së bashku vrullin e zhvillimit të nivelit të lartë në marrëdhëniet Rusi-Kinë dhe për të promovuar një botë shumëpolare më të drejtë e të barabartë, si edhe një kuadër sigurie të pandashëm në të gjithë Euroazinë.
