Foto nga VCG
Hekurudha me shpejtësi të lartë Xian-Shiyan e Kinës ka nisur provat me shpejtësi deri në 385 km/orë, duke shënuar një hap kyç drejt hapjes së kësaj linje hekurudhore.
Të martën, një tren inspektimi gjithëpërfshirës u nis nga Stacioni Lindor i Xian-it në provincën Shaanxi të Kinës Veriperëndimore, duke udhëtuar nëpër malet Qinling drejt stacionit Yunxi në provincën Hubei të Kinës Qendrore. Kjo shënjon fillimin e testimit në nivelin më të lartë të shpejtësisë së linjës, pas provave të mëparshme të përshpejtimit me faza. Pas disa raundeve të provave, treni arriti me sukses shpejtësinë e synuar prej 385 km/orë, duke hedhur një themel të fortë për funksionimin e ardhshëm.
Gjatë provave, treni i inspektimit, i pajisur me dhjetëra sensorë, kamera dhe sisteme monitorimi me saktësi të lartë, mblodhi të dhëna në kohë reale mbi gjeometrinë e binarëve, bashkëveprimin pantograf-katenar dhe cilësinë e sinjalit të komunikimit. Testet synojnë të vlerësojnë performancën dhe besueshmërinë e të gjitha sistemeve në kushte funksionimi ekstreme.
Hekurudha kalon nëpër qytetet Xian, Shangluo e Shiyan dhe lidhet me linjën ekzistuese të shpejtësisë së lartë Wuhan-Shiyan. Linja kryesore e ndërtuar rishtazi shtrihet 256 km, me një shpejtësi të projektuar prej 350 km/orë. Nga gjatësia e përgjithshme, 170 km shtrihen në Shaanxi dhe 86 km në Hubei.
Pasi kjo hekurudhë të vihet në funksionim, koha e udhëtimit midis Xian-it dhe Shiyan-it do të ulet në rreth një orë. Udhëtimet nga Xian-i për në Xiangyang parashikohet të zgjatin rreth dy orë, ndërsa udhëtimet për në Wuhan do të kërkojnë afërsisht tre orë.
Linja e re pritet të përmirësojë më tej rrjetin hekurudhor me shpejtësi të lartë të Kinës, të shkurtojë kohët e udhëtimit midis Shaanxi-së e rajoneve të mëdha ekonomike, si Delta e Lumit Jance dhe Delta e Lumit të Perlave, si edhe të forcojë lidhjet midis grupimit të qyteteve Guanzhong dhe rrjedhës së mesme të lumit Jance. Gjithashtu, ajo pritet të mbështesë rigjallërimin rural në rajonin malor Qinba dhe të nxisë zhvillimin ekonomik e shoqëror gjatë zonave në të cilat kalon.
