Presidenti i Sierra-Leones, Julius Maada Bio, dha një intervistë për Grupin Mediatik të Kinës.
Gjatë intervistës, Bio theksoi që marrëdhëniet mes Sierra-Leones dhe Kinës kanë themele të forta dhe një vrull të fuqishëm zhvillimi, ndërsa shtylla e tyre kryesore është respekti i ndërsjellë.
Ai tha se në Sierra-Leone mbi një milion njerëz merren drejtpërdrejt me peshkim dhe pa infrastrukturën e përshtatshme, përfitimet nga ky sektor do të ishin të kufizuara. Kina nuk bën gjeste simbolike, por vendosi të ndërtojë një port peshkimi me infrastrukturë të plotë, në mënyrë që peshkatarët të sigurojnë të ardhura më të larta dhe qeveria të përfitojë më shumë të ardhura fiskale. Një infrastrukturë e tillë është një dhuratë nga Republika Popullore e Kinës, vlera e së cilës nuk mund të matet thjesht me para, vuri në dukje kreu i shtetit i Sierra-Leones.
Bio nënvizoi gjithashtu se Kina ka shpallur qartë trajtim me tarifë zero për vendet afrikane me të cilat ka marrëdhënie diplomatike. Sierra-Leone pret një Kinë që zhvillohet së bashku me miqtë e saj, u shpreh ai, duke shtuar që zhvillimi dhe miqësia nuk janë kurrë në kundërshtim. Ndërsa Kina përparon, ajo i merr me vete edhe partnerët e saj, duke kontribuuar për një botë më paqësore.
