Foto nga VCG
Kina vlerëson vendimin e qeverisë së Papua Guinesë së Re për mbylljen e “Zyrës Ekonomike të Tajpeit”. Ky vendim tregon edhe një herë se respektimi i parimit të një Kine, është në përputhje me prirjen e opinionit publik ndërkombëtar dhe rrjedhën e historisë, deklaroi të hënën zëdhënësi i Ministrisë së Jashtme të Kinës, Guo Jiakun.
Guo i bëri këto komente gjatë një konference të rregullt për shtyp, në përgjigje të një pyetjeje lidhur me njoftimin e 6 nëntorit nga e ashtuquajtura “zyrë e punëve të jashtme” e Tajvanit, sipas të cilit “Zyra Ekonomike e Tajpeit” në Port Moresby do të mbyllej dhe nuk do të nënshkruheshin kontrata të reja për blerjen e gazit natyror të lëngshëm (LNG) me Papua Guinenë e Re.
Autoritetet e Tajvanit deklaruan gjithashtu se Papua Guinea e Re kishte përsëritur kërkesat e saj të njëanshme që personeli i kësaj “zyre” të largohej nga vendi brenda një afati të caktuar dhe që “zyra” të mbyllej.
Guo theksoi se Kina e vlerëson këtë vendim dhe do të vazhdojë të bashkëpunojë me Papua Guinenë e Re për të mbështetur me vendosmëri interesat thelbësore dhe shqetësimet kryesore të njëra-tjetrës.
Ai shtoi se Kina është e gatshme të rrisë importet e gazit natyror të lëngshëm nga Papua Guinea e Re, të thellojë bashkëpunimin ekonomik, tregtar dhe në fusha të tjera, si dhe t’i japë përmbajtje të re partneritetit të gjithanshëm strategjik Kinë-Papua Guinea e Re.
