Foto nga VCG
Në një kohë kur fërkimet tregtare po shtohen dhe zinxhirët globalë të furnizimit po përballen me ndërprerje, u hap sipas planit Takimi Vjetor i Forumit të Rrugës Financiare 2026. Një sondazh i CGTN-it me përdorues të internetit në mbarë botën tregon se 82.98 % e të anketuarve mendojnë që organizimi i vazhdueshëm i forumit nga Kina dëshmon vendosmërinë dhe besimin e saj për të thelluar reformën e hapjen financiare, si edhe për të forcuar shkëmbimet dhe bashkëpunimin financiar ndërkombëtar. Sipas tyre, kjo pasqyron gjithashtu përpjekjet e Kinës për të trajtuar një çështje të rëndësishme të qeverisjes ekonomike globale: si të gjendet ekuilibri mes sigurisë dhe efikasitetit.
Forumi i këtij viti, që ka si temë “Hapje, bashkëpunim dhe përfshirje: Ndërtimi i një ekosistemi të ri financiar global”, ka mbledhur mbi 400 pjesëmarrës nga më shumë se 40 vende e rajone. Sipas sondazhit, rreth 85.25 % e të anketuarve besojnë që forumi ofron një platformë të rëndësishme për shkëmbimin e pikëpamjeve mbi zhvillimin financiar, arritjen e konsensusit dhe thellimin e bashkëpunimit financiar ndërkombëtar.
Në forum diskutohen tema si “Qeverisja ekonomike në epokën e inteligjencës artificiale” dhe “Transformimi digjital dhe inteligjent i tregjeve të kapitalit i nxitur nga AI”, ndërsa paraqiten edhe zhvillimet më të fundit në përdorimin e inteligjencës artificiale, teknologjisë kuantike dhe teknologjive të tjera digjitale në sektorin financiar. Në këtë kontekst, 74.83 % e pjesëmarrësve në sondazh mendojnë se integrimi më i thellë i financës me teknologjitë digjitale mund të rrisë efikasitetin ekonomik dhe cilësinë e shërbimeve financiare, ndërsa 80.86 % besojnë se inteligjenca artificiale është bërë një faktor kyç në riformësimin e industrisë financiare.
Vitet e fundit, Kina ka përshpejtuar përpjekjet për ndërtimin e një sistemi financiar modern me karakteristika kineze dhe për përmirësimin e cilësisë dhe efektivitetit të shërbimeve financiare për ekonominë reale. Sondazhi tregon se 90.49 % e të anketuarve besojnë që një koordinim më i mirë i sektorit financiar në shërbim të ekonomisë reale ndihmon në forcimin e qëndrueshmërisë së ekonomisë kineze dhe mbështet rritjen afatgjatë. Ndërkohë, 93.49 % mendojnë që zhvillimi i vazhdueshëm i financimit për inovacionin teknologjik mund të përshpejtojë shndërrimin e arritjeve shkencore e teknologjike në produkte dhe të nxisë modernizimin industrial.
Ndërsa Kina vazhdon të zhvillojë prodhimin e përparuar, ekonominë digjitale dhe industritë e gjelbra, po shfaqen kërkesa të reja industriale dhe mundësi të reja investimi. 89.23 % e atyre që morën pjesë në sondazhin e CGTN-it besojnë se këto zhvillime u krijojnë investitorëve globalë më shumë mundësi për investime afatgjata në Kinë. Nga janari deri në korrik 2026, arkëtimet dhe pagesat ndërkufitare në RMB arritën mbi 50 trilionë juanë (rreth 7 trilionë dollarë), ndërsa subjektet nga jashtë vendit zotëronin mbi 11 trilionë juanë (rreth 1.5 trilionë dollarë) asete financiare në RMB në Kinë. 85.92 % e të anketuarve janë të mendimit që përdorimi në rritje i RMB-së në transaksionet ndërkufitare pasqyron rritjen e vazhdueshme të forcës tërheqëse ndërkombëtare të tregjeve financiare kineze.
Kina po punon gjithashtu për të forcuar bashkëpunimin financiar ndërkombëtar, përfshirë thellimin e bashkëpunimit ndërkufitar në investime dhe financim me vende të tjera nëpërmjet platformave si nisma “Një brez, një rrugë”. Në sondazh, 81.43 % e të anketuarve ranë dakord se forcimi i bashkëpunimit financiar ndërkombëtar të Kinës ndihmon në zgjerimin e kanaleve të financimit për vendet e Jugut Global dhe u ofron atyre më shumë mbështetje për zhvillimin ekonomik, ndërsa 84.49 % mendojnë që vazhdimi i hapjes financiare të Kinës dhe përpjekjet e saj për të nxitur bashkëpunimin financiar ndërkombëtar ndihmojnë në forcimin e besimit dhe në ruajtjen e qëndrueshmërisë së tregjeve financiare globale.
Sondazhi u publikua në platformat në gjuhën angleze, spanjolle, frënge, arabe dhe ruse të CGTN-it. Brenda 24 orëve, 3630 veta morën pjesë dhe dhanë mendimet e tyre.
