foto nga CMG
Robotë humanoidë, pajisje robotike me skelet të jashtëm për të ndihmuar në ecje, syze me inteligjencë artificiale… në Panairin e 140-të të Import-Eksportit të Kinës (Panairi i Kantonit) që po mbahet tani, një grup i madh produktesh të avancuara që përfaqësojnë fuqinë e re të prodhimit po prezantohen së bashku. “Panairi tregon fuqinë e teknologjisë”, “ndërton urën e bashkëpunimit tregtar ndërkombëtar”, “Panairi është platforma më e besueshme globale e biznesit”… opinionet ndërkombëtare po i japin vlerësime pozitive të shumta këtij panairi.
2026-a është viti i nisjes së Planit të 15-të 5-vjeçar të Kinës, dhe gjithashtu 70-vjetori i themelimit të Panairit të Kantonit.
Gjatë 70 viteve, sipërfaqja ekspozuese e Panairit është rritur nga 9600 metra katrorë në fillim në 1.55 milionë metra katrorë, dhe numri i blerësve ka shkuar nga 1200 në mbi 300 mijë këtë vit. Ai është bërë një nga ngjarjet më të mëdha ndërkombëtare të tregtisë në Kinë, me historinë më të gjatë, përmasën më të madhe dhe transaksionet më të shumta, duke fituar reputacionin e “Ekspozitës së Parë të Kinës” në mbarë botën.
Siç theksoi kryetari i shtetit i Kinës Xi Jinping në letrën e tij për këtë Panair, “Panairi i Kantonit, gjatë 70 viteve të tij, ka luajtur një rol të rëndësishëm në promovimin e marrëdhënieve tregtare mes Kinës e botës së jashtme dhe është bërë një platformë efektive për zgjerimin e hapjes së Kinës ndaj botës dhe për ndërtimin e një ekonomie botërore të hapur.”
Panairi i Kantonit i këtij viti fokusohet te temat e prodhimit të avancuar dhe ekspozon arritjet më të fundit në 5 sektorë kryesorë: pajisjet elektronike dhe shtëpiake, prodhimin industrial, ndriçimin elektrik, veglat e mjetet metalike, si edhe automjetet dhe motoçikletat.
Në zonën e robotëve të shërbimit, ekspozohen produktet më të fundit në fushat, si inteligjenca e mishëruar, punët e posaçme dhe shërbimi publik. Për herë të parë janë paraqitur 22 skenarë aplikimesh inteligjente dhe 16 aplikime të veçanta të AI-së, duke mundësuar navigimin në nivel të përgjithshëm në pavijonet e panairit. Gjithashtu, janë nënshkruar marrëveshje me 12 partnerë të rinj globalë, duke e çuar numrin total në 240. Panairi ka pasur plot ide të reja dhe shumë vizitorë.
Blerësi nga Singapori Lin Zerong tha se Panairi i Kantonit i lejoi ata të lidhen shpejt me furnizues të cilësisë së lartë, duke e bërë bashkëpunimin ndërkombëtar më të sinqertë dhe më të qëndrueshëm.
Një blerës kanadez e përshkroi panairin si “të mahnitshëm”, duke vënë në dukje se shumë produkte përfshinin robotë dhe teknologji AI, dhe arritjet inovative ishin shumë të pasura.
Gjatë 70 viteve, përse Panairi i Kantonit ka treguar gjallëri të re? Profesori i Fakultetit të Ekonomisë në Universitetin Renmin të Kinës Wang Xiaosong tha se kjo kryesisht u atribuohet përpjekjeve të vazhdueshme të Kinës për të promovuar inovacionin teknologjik dhe zhvilluar burime të reja të energjisë ekonomike.
Kohët e fundit, shumë kompani kineze kanë integruar internetin industrial dhe AI në zinxhirët e prodhimit, duke tërhequr klientë nga e gjithë bota. Për më tepër, Kina ka një sistem industrial të kompletuar, që lejon që produktet me vlera të reja të arrijnë vazhdimisht në ekspozita, duke lidhur prodhimet kineze me kërkesat globale.
Krahas kësaj, Kina ka vazhduar të zgjerojë hapjen e saj ndaj botës, duke përdorur Panairin e Kantonit si një platformë të qëndrueshme për bashkëpunim ndërkombëtar dhe tregtar, duke krijuar më shumë mundësi fitimprurëse për të gjitha palët.
