Avioni kinez C919 nis nga Pekin për në Mongoli, duke filluar fluturim të parë ndërkombëtar, gusht 2026/Foto nga VCG
Avioni i pasagjerëve C919, i prodhuar nga Kina, ka transportuar më shumë se 8.4 milionë pasagjerë dhe ka shërbyer në 27 qytete që nga hyrja në shërbimin komercial, deklaroi të enjten Shen Bo, president i Korporatës së Avionëve Komercialë të Kinës (COMAC).
Duke folur në një konferencë të industrisë në Dunhuang, në provincën Gansu të Kinës Veriperëndimore, Shen tha se COMAC ka vazhduar gjithashtu të zgjerojë rrjetin e aviacionit rajonal që mbulohet nga avionët e saj C909 – një avion rajonal i projektuar për fluturime në distanca të shkurtra dhe të mesme.
C909 ka transportuar në mënyrë të sigurt më shumë se 41 milionë pasagjerë që nga hyrja në shërbimin komercial, tha Shen, duke shtuar se ky avion u ofron udhëtarëve mundësi më të përshtatshme.
Wang Changshun, kryetar i Shoqatës së Transportit Ajror të Kinës, u shpreh se flota e aviacionit rajonal të Kinës ka përjetuar një transformim të shpejtë vitet e fundit, ku avionët e prodhuar brenda vendit zënë një pjesë dukshëm më të madhe.
Foto nga VCG
Foto nga VCG
C919 po përshpejton zgjerimin e operacioneve të tij komerciale, ndërsa C909 është bërë një element kyç i tregut të aviacionit rajonal, duke kontribuar në zhvillimin cilësor të sektorit të aviacionit rajonal në Kinë, tha ai.
C919 është avioni i parë pasagjerësh për linja kryesore, i zhvilluar në mënyrë të pavarur nga Kina, në përputhje me standardet ndërkombëtare të aftësisë fluturuese dhe me të drejta të pavarura të pronësisë intelektuale.
Modeli bazë është projektuar për të transportuar nga 158 deri në 192 pasagjerë, me një rreze fluturimi prej 4.075 deri në 5.555 kilometrash. Ai kreu fluturimin e tij të parë komercial në maj të vitit 2023. Pas operacioneve të suksesshme në disa linja të brendshme, avioni realizoi fluturimin e tij të parë ndërkombëtar të planifikuar për pasagjerë në gusht të këtij viti.
C909, i njohur më parë si ARJ21, hyri në shërbimin komercial në vitin 2016. Sipas COMAC, ky avion është i përshtatshëm për aeroporte rajonale ose aeroporte dytësore (në rrjetin e nyjeve ajrore), duke ndihmuar në krijimin e rrjeteve të linjave dhe në plotësimin e kapaciteteve të transportit për aeroportet kryesore (nyjet ajrore). Tregu i aviacionit civil në Kinë vazhdoi të zgjerohej në vitin 2025, duke regjistruar 770 milionë udhëtime pasagjerësh, një rritje prej 5.5% krahasuar me vitin e mëparshëm, sipas Administratës së Aviacionit Civil të Kinës.
Plani më i fundit pesëvjeçar i vendit për zhvillimin e aviacionit civil, që mbulon periudhën 2026-2030, parashikon përmirësimin e infrastrukturës së transportit, efikasitetit dhe shërbimeve, si dhe nxitjen e inovacionit të pavarur dhe integrimit industrial. Ai përcakton si objektiv për vitin 2030 arritjen e standardeve të nivelit botëror në fushën e sigurisë së aviacionit, kapacitetit të shërbimeve dhe infrastrukturës.
