Volker Adams, Drejtor i Çështjeve Politike dhe Turizmit në Shoqatën Gjermane të Udhëtimit/Foto nga CMG
Volker Adams, Drejtor i Çështjeve Politike dhe Turizmit në Shoqatën Gjermane të Udhëtimit u shpreh në një intervistë për CMG se udhëtimi për në Kinë po bëhet gjithnjë më i lehtë dhe i rehatshëm dhe se populli kinez është shumë mikpritës, i hapur dhe plot entuziazëm. Adams, një profesionist turizmi që ka vizituar Kinën shumë herë, thotë se sa më shumë udhëton në Kinë, aq më shumë shtohet dëshira për të mësuar dhe rritet lista e tij e udhëtimeve. Turistët evropianë nuk janë të interesuar vetëm për historinë e gjatë dhe kulturën e pasur të Kinës, por janë të etur të mësojnë rreth Kinës moderne dhe jetës së përditshme të popullit.
Shoqata Gjermane e Turizmit ku Adams punon, ka bashkëpunim të ngushtë me shumë institucione dhe shoqata kineze, duke punuar së bashku për të nxitur shkëmbimet kulturore dhe turistike midis Kinës dhe Gjermanisë.
Adams mirëpret shumë turistë kinezë që udhëtojnë në Evropë dhe Gjermani. Ai thekson se turizmi bashkon njerëz të ndryshëm, rrit mirëkuptimin, ndërton miqësi dhe besim, ndaj është një industri që nxit paqen.
Volker Adams, Drejtor i Çështjeve Politike dhe Turizmit në Shoqatën Gjermane tha:
Udhëtimi për në Kinë është bërë gjithnjë e më i lehtë. Politika e vizave që përmendët, si dhe udhëtimet brenda Kinës, shërbimet e pagesave dhe gjëra të tilla, e bëjnë më të rehatshme për pushuesit gjermanë të udhëtojnë në Kinë dhe brenda saj. Ky është një faktor i rëndësishëm. Faktori i dytë është se media gjermane po raporton gjithnjë e më shumë për Kinën, për stilin e jetesës, për zhvillimet në vend. Kjo e bën mjaft interesante për gjermanët, ndaj ata kërkojnë të kenë një pamje personale të asaj se çfarë po ndodh në Kinë.
Kam qenë mjaft shpesh në Kinë. Dhe çështja është se, sa më shumë udhëtoj në Kinë, aq më shumë vende gjej që nuk i kam vizituar, ndaj lista ime e dëshirave rritet vazhdimisht. Me siguri do të kthehem sërish. Ajo që më intereson nga Kina nuk është vetëm kultura e thellë dhe historia. Kjo është shumë emocionuese. Më pëlqen edhe kuzhina. Kuzhina është e mrekullueshme. Ushqimi kinez është i shkëlqyer. Por gjëja kryesore është të njihem me kinezët, të cilët janë shumë bujarë, të hapur, mikpritës dhe të gatshëm të flasin me miqtë e huaj. Besoj se stili i jetesës së njerëzve të zakonshëm është mjaft intrigues. Të shohësh kinezët si e kalojnë jetën e tyre të përditshme dhe ta krahasosh me jetesën këtu në Gjermani.
në Wuhan, në provincën Hubei kanë automjete pa shofer/Foto nga VCG
Udhëtimi im i radhës në Kinë do të jetë në Panairin Ndërkombëtar të Turizmit në Shangai (ITB China në Shangai). Prej andej do të shkojmë në Hangzhou për t’u takuar me partnerët tonë të Aleancës Botërore të Turizmit (WTA). Në vazhdim, gjë që personalisht më duket mjaft emocionuese, do të marrim trenin për në Wuhan, në provincën Hubei. Do të shohim automjete pa shofer, gjë që do të jetë shumë emocionuese për mua dhe grupin tonë. Do të udhëtojmë drejt Tre Grykave, do të shohim si po zhvillohen produktet turistike në Lumin Jangce dhe cilat janë hapat e mëtejshme të planifikuara nga qeveria provinciale e Hubeit. Ndaj gjej gjëra jashtëzakonisht emocionuese.
Ne po bashkëpunojmë ngushtë me Aleancën Botërore të Turizmit (WTA) me seli në Hangzhou, një shoqatë turizmi. Jemi në shkëmbime të vazhdueshme mbi mënyrat si po zhvillohet turizmi në të dy vendet. Qoftë me WTA qoftë me Shoqatën Gjermane të Udhëtimit (DRV), synojmë të nxisim turizmin midis të dy vendeve. Ky është për ne një shembull. Gjithashtu kemi krijuar një rrjet kinez këtu në Gjermani, duke përfshirë jo vetëm operatorët turistikë që merren me udhëtime për në Kinë dhe nga Kina, por edhe Bordin Kinez të Turizmit në Frankfurt dhe Ambasadën e Kinës këtu në Berlin. Pra, shumë palë të interesuara, linja ajrore, partnerë mediatikë… Është mjaft emocionuese të shohësh si po ndodh kjo dinamikë. Po shohim mjaft rezultate pozitive nga bashkëpunimi me njëri-tjetrin.
Turistët e huaj në Pekin/Foto nga VCg
Në fakt, besoj se Kina duhet të përpiqet të tërheqë pak më shumë të rinj. Dhe besoj se duke e pozicionuar dhe duke nxjerrë në pah Kinën e re dhe moderne, kjo mund të realizohet. Kjo është ajo që ne do donim të shihnim vërtet. Një diversifikim të produktit turistik brenda Kinës. Ne besojmë se Kina, ka shumë më tepër sesa thjesht vende historike. Brezi i ri mund të jenë çelësi për të hapur derën për të shfaqur Kinën moderne, industrinë e automjeteve, madje edhe stilin e jetesës. Kjo është diçka mjaft emocionuese.
Besoj se për shkak të globalizimit dhe zhvillimit të medias, gjermanët janë më të vetëdijshëm për ç’ka po ndodh në Kinë. Po shfaqin gjithnjë e më shumë interes se si kinezët, veçanërisht të rinjtë kinezë, e kalojnë kohën e tyre të lirë, çfarë bëjnë. Kjo reflektohet në formatet mediatike që po shohim në mediat sociale, por edhe në programet televizive, kanalet e transmetimit. Është mirë të shohësh që gjermanët janë të interesuar për stilin e jetesës kineze dhe anasjelltas.
Shpresojmë që më shumë kinezë të vijnë në Evropë, veçanërisht në Gjermani. Besojmë se kjo është një gjë shumë pozitive. Mund ta imagjinoj që kinezët të vijnë në Evropë sepse edhe Evropa ka një kulturë dhe histori të thellë dhe është jashtëzakonisht e larmishme. Ka kaq shumë për të parë dhe për të përjetuar. Evropianët janë mikpritës të mirë dhe janë shumë të lumtur të shohin që kinezët po vijnë.
Ne këtu në Shoqatën Gjermane të Udhëtimit, pretendojmë se turizmi është industria e paqes. Duke bashkuar njerëzit, duke krijuar mirëkuptim, duke ndihmuar në krijimin e marrëdhënieve, miqësive dhe besimit, kjo ndihmon në ndërtimin e një ure midis shoqërive, ndaj besojmë se ky është një nënprodukt shumë pozitiv i turizmit.
