Foto nga CMG
Kina dhe Evropa kohët e fundit mbajtën takimin e dytë të mekanizmit të tyre të konsultimit për tregtinë dhe investimet, duke arritur një konsensus prej 16 pikash, përfshirë ato që lidhen me tregtinë e automobilave. Kjo tregon se të dyja palët kanë bërë përparim të ri në zgjidhjen e mosmarrëveshjeve ekonomike dhe tregtare nëpërmjet negociatave.
Në një intervistë të kohëve të fundit për Grupin Mediatik të Kinës (CMG), Eberhard J. Trempel, Drejtor i Përgjithshëm i Forumit Gjerman për Tregtinë Globale të Berlinit, i cili prej kohësh ka promovuar shkëmbimet ekonomike e tregtare midis Kinës dhe Gjermanisë, theksoi se Kina ndjek rregullat tregtare. Nëse Evropa beson se rregullat ekzistuese nuk janë më të zbatueshme, ajo duhet të kërkojë ta zgjidhë çështjen nëpërmjet negociatave me Kinën. Vendosja arbitrare e kufizimeve tregtare mund të japë rezultate afatshkurtra, por në fund të fundit, kjo vetëm do të jetë vetëdëmtuese. Ai i kërkoi Evropës të ruajë dialogun me Kinën, të shmangë kundërvënien tregtare dhe të kërkojë zgjidhjet fitimprurëse për të dyja palët nëpërmjet negociatave pragmatike.
Foto nga CMG
Në vijim janë deklaratat e z. Trempel:
“Kina po ndjek rregullat. Bashkimi Evropian po vendos rregulla të reja, sepse ato të vjetrat nuk janë më të përshtatshme. Së pari, kur negocioni, duhet t’i respektoni rregullat tuaja. Askush nuk ka të drejtë t’i ndryshojë rregullat vetëm sepse ato, si rezultat i negociatave, i kanë sjellë epërsi partnerit. Dhe kur vërejmë që rregullat e negociuara më parë nuk janë më të përshtatshme – pasi krijojnë disavantazhe që shkaktojnë probleme të shumta – atëherë duhet të negociojmë sërish. Ky është thelbi i çështjes.
Ata që vendosin sanksione, në fakt, ndëshkojnë veten. Kjo mund të sjellë një epërsi afatshkurtër, por në fund, është konsumatori – përdoruesi përfundimtar – ai që duhet të paguajë më shumë për gjithçka. Nga vijnë materialet? Për shembull, panelet diellore. A po krijojmë vallë një industri të re evropiane të paneleve diellore? Kushdo që beson se ky do të jetë përfundimi, duhet ta rishqyrtojë mendimin e tij. Pra, e theksoj sërish: një politikë e ekuilibruar është thelbësore. Kur vërehen kapacitete të tepërta – të cilat shërbejnë për të mbrojtur ekonominë në periudhë afatshkurtër – ato mund të merren parasysh, por kjo nuk është kurrë zgjidhja përfundimtare apo konkluzioni i fundit. Kjo duhet të shoqërohet me një qasje strategjike, duke vlerësuar se çfarë është vërtet e nevojshme dhe nëse një masë e tillë është vërtet e dobishme.
Foto nga CMG
Diskutimi është gjithmonë i mirëpritur. Kjo do të thotë që edhe ata që ngurrojnë apo janë të rezervuar ndaj Kinës, pranojnë të ulen në tryezën e diskutimit. Kjo është pozitive. Për sa kohë ka dialog, nuk ka luftë tregtare. Dhe aktualisht, sfida më e rrezikshme është pikërisht mundësia që dikush të nxisë një luftë tregtare vetëm për shkak të një të ashtuquajture “mungesë ekuilibri”. Për sa kohë negociojmë dhe krijojmë hapësirë për kontroll e rregullim, jemi në kërkim të zgjidhjeve. Kjo është pozitive. Unë mbetem disi skeptik dhe e shoh BE-në në një situatë mjaft të vështirë. Megjithatë, le të shpresojmë që këto negociata do të çojnë në hapa konkretë, të dobishëm për të dyja palët. Gjëja më e rëndësishme është të identifikohen çështjet thelbësore – ato që duhen diskutuar dhe zgjidhur – duke shmangur ndërprerjen e negociatave apo nisjen e veprimeve që çojnë në luftë tregtare. Rishqyrtoni masat e marra në të kaluarën, për të siguruar që gabimet të shmangen në të ardhmen. Kemi nevojë për një dialog, një dialog të qëndrueshëm nga të dyja palët.”
